മൺട്രിയോൾ : ലിക്വർ കൺട്രോൾ ബോർഡ് ഓഫ് ഒൻ്റാരിയോ തൊഴിലാളികളുടെ പണിമുടക്കിൽ നേട്ടം കൊയ്ത് കെബെക്ക് ലിക്വർ ബോർഡ്. പ്രവിശ്യ അതിർത്തിയിലുള്ള ചില സ്റ്റോറുകളിൽ വിൽപ്പന കുതിച്ചുയർന്നതായി കോർപ്പറേഷൻ പറയുന്നു. ഒൻ്റാരിയോ അതിർത്തിക്ക് സമീപമുള്ള 20-25 ഔട്ട്ലെറ്റുകളിലെ ഷെൽഫുകൾ കഴിഞ്ഞ ആഴ്ച മുതൽ അതിവേഗം ശൂന്യമായതായി സൊസൈറ്റ് ഡെസ് ആൽക്കൂൾസ് ഡു കെബെക്ക് (SAQ) വക്താവ് ലിൻഡ ബൗച്ചാർഡ് പറയുന്നു.
റെഡി-ടു ഡ്രിങ്ക് ഇനങ്ങൾക്കും സ്പിരിറ്റുകൾക്കുമാണ് ഏറ്റവും കൂടുതൽ ആവശ്യക്കാരെന്നും SAQ ഇത്തരം ഉൽപ്പന്നങ്ങളുടെ സ്റ്റോക്ക് ക്രമീകരിക്കണമെന്നും ലിൻഡ ബൗച്ചാർഡ് പറഞ്ഞു. വിൽപ്പനയിലെ വർധന ഇതുവരെ കണക്കാക്കിയിട്ടില്ല. എന്നാൽ, അതിൻ്റെ എല്ലാ സ്റ്റോറുകളിലും സ്റ്റോക്ക് ഉറപ്പു വരുത്തുന്നതിലാണ് തൽക്കാലം ശ്രദ്ധ കേന്ദ്രീകരിക്കുന്നതെന്നും ലിൻഡ ബൗച്ചാർഡ് അറിയിച്ചു.
ചർച്ചകൾ പരാജയപ്പെട്ടതിനെത്തുടർന്ന് എൽസിബിഒയിലെ ഏകദേശം പതിനായിരം തൊഴിലാളികൾ ജൂലൈ 5 ന് പണിമുടക്ക് ആരംഭിച്ചിരുന്നു. LCBO സ്റ്റോറുകൾക്ക് പുറത്ത് റെഡി-ടു-ഡ്രിങ്ക് കോക്ടെയിലുകൾ വിൽക്കുന്ന പ്രവിശ്യയുടെ മദ്യം വിപുലീകരണ പദ്ധതികളാണ് തർക്കത്തിലെ പ്രധാന പ്രശ്നമെന്ന് തൊഴിലാളികളെ പ്രതിനിധീകരിക്കുന്ന ഒൻ്റാരിയോ പബ്ലിക് സർവീസ് എംപ്ലോയീസ് യൂണിയൻ പറയുന്നു.