ഓട്ടവ : കനേഡിയൻ സമ്പദ്‌വ്യവസ്ഥയിൽ വ്യാപാരയുദ്ധത്തിൻ്റെ ആഘാതങ്ങൾക്കിടയിൽ ബാങ്ക് ഓഫ് കാനഡ ഇന്ന് പലിശ നിരക്ക് പ്രഖ്യാപിക്കും. മാർച്ചിൽ സെൻട്രൽ ബാങ്ക് അതിൻ്റെ പോളിസി നിരക്ക് കാൽ പോയിൻ്റ് കുറച്ച് 2.75 ശതമാനമാക്കിയിരുന്നു. കഴിഞ്ഞ മാസം വാർഷിക പണപ്പെരുപ്പ നിരക്ക് 2.3 ശതമാനമായി കുറഞ്ഞുവെന്ന് സ്റ്റാറ്റിസ്റ്റിക്സ് കാനഡ റിപ്പോർട്ട് ചെയ്തതിന് തൊട്ടുപിന്നാലെയാണ് തീരുമാനം.
ഇന്ന് നടക്കുന്ന പലിശനിരക്ക് പ്രഖ്യാപനത്തിൽ ബാങ്ക് ഓഫ് കാനഡ നിരക്ക് നിലനിർത്തിയേക്കുമെന്ന് സാമ്പത്തിക വിദഗ്ധർ പ്രവചിക്കുന്നു. കൂടാതെ അമേരിക്കയുമായുള്ള കാനഡയുടെ താരിഫ് യുദ്ധത്തിൻ്റെ മധ്യത്തിലാണ് നിരക്ക് തീരുമാനം വരുന്നത്, ഇത് സെൻട്രൽ ബാങ്കിൻ്റെ തീരുമാനത്തെ സങ്കീർണ്ണമാക്കുന്നുവെന്ന് പല സാമ്പത്തിക വിദഗ്ധരും പറയുന്നു. അതേസമയം അമേരിക്കയുമായുള്ള താരിഫ് തർക്കത്തിൽ നിന്നുള്ള സാമ്പത്തിക ആഘാതവും വ്യാപാര യുദ്ധത്തിൽ നിന്നുള്ള ഉയർന്ന വിലയും ഒരേ സമയം നേരിടാൻ കഴിയില്ലെന്ന് ബാങ്ക് ഓഫ് കാനഡ മുന്നറിയിപ്പ് നൽകുന്നു.
