ഓട്ടവ : ഗുരുതര ആരോഗ്യപ്രശ്നങ്ങൾക്ക് കാരണമാകുന്ന ലിസ്റ്റീരിയ മോണോസൈറ്റോജീൻസ് അണുബാധയെ തുടർന്ന് ജനറിക് എനോക്കി കൂണുകൾ തിരിച്ചു വിളിച്ചതായി കനേഡിയൻ ഫുഡ് ഇൻസ്പെക്ഷൻ ഏജൻസി (CFIA) അറിയിച്ചു. നോവസ്കോഷ, ഒൻ്റാരിയോ, കെബെക്ക് എന്നിവിടങ്ങളിൽ 200 ഗ്രാം കണ്ടെയ്നറുകളിൽ പായ്ക്ക് ചെയ്ത എനോക്കി കൂണുകൾ ജാക്കി ട്രേഡിങ് ഇന്‍റർനാഷണൽ ആണ് വിതരണം ചെയ്തിരിക്കുന്നത്.
തിരിച്ചുവിളിച്ച കൂൺ കഴിക്കുകയോ ഉപയോഗിക്കുകയോ വിളമ്പുകയോ വിതരണം ചെയ്യുകയോ ചെയ്യരുതെന്ന് ഏജൻസി നിർദ്ദേശിച്ചു. ഇവ ഉപേക്ഷിക്കുകയോ വാങ്ങിയ സ്റ്റോറിൽ തിരികെ നൽകുകയോ വേണമെന്നും CFIA അറിയിച്ചു. ലിസ്റ്റീരിയ മോണോസൈറ്റോജീൻസ് അടങ്ങിയ ഭക്ഷണം കഴിക്കുന്നത് ഗർഭിണികൾക്കും, പ്രായമായവർക്കും രോഗപ്രതിരോധ ശേഷി കുറഞ്ഞവർക്കും ഗുരുതരമായ ആരോഗ്യപ്രശ്നങ്ങൾക്ക് കാരണമാകും. ഛർദ്ദി, ഓക്കാനം, നിരന്തരമായ പനി, പേശിവേദന, കടുത്ത തലവേദന തുടങ്ങിയവയാണ് പ്രധാനലക്ഷണങ്ങൾ. ഈ ലക്ഷണങ്ങൾ പ്രകടിപ്പിക്കുന്നവർ ഉടൻ തന്നെ ഡോക്ടറുമായി ബന്ധപ്പെടണം.
