ഹാലിഫാക്സ് : നോവസ്കോഷയിൽ കനത്ത നാശം വിതച്ച് വെസ്റ്റ് ഡൽഹൗസിയിലെ ലോങ് ലേക്ക് കാട്ടുതീ. നിയന്ത്രണാതീതമായ കാട്ടുതീ തിങ്കളാഴ്ച 7,780 ഹെക്ടറിൽ നിന്ന് 8,026 ഹെക്ടറായി വളർന്നു. ഓഗസ്റ്റ് 13-ന് ആദ്യം ആരംഭിച്ച ലോങ് ലേക്ക് കാട്ടുതീ പാരഡൈസ് തടാകത്തിന്‍റെ ഇരുവശത്തും വ്യാപിച്ചതായി പ്രവിശ്യാ പ്രകൃതിവിഭവ വകുപ്പ് (ഡിഎൻആർ) പറയുന്നു.
ട്രൗട്ട് തടാകത്തിലേക്ക് കാട്ടുതീ പടരുന്നത് തടയാൻ ശ്രമിക്കുന്നതിനാൽ ചൊവ്വാഴ്ച പാരഡൈസ് തടാകത്തിന്‍റെ കിഴക്കുവശത്ത് അഗ്നിശമനസേനാംഗങ്ങൾ ശ്രദ്ധ കേന്ദ്രീകരിക്കുന്നുണ്ടെന്ന് ഡിഎൻആർ അറിയിച്ചു. ആറ് ഹെലികോപ്റ്ററുകൾ, ആറ് വിമാനങ്ങൾ, 56 DNR അഗ്നിശമനസേനാംഗങ്ങൾ, 62 ഒൻ്റാരിയോ അഗ്നിശമനസേനാംഗങ്ങൾ, 47 പ്രാദേശിക അഗ്നിശമനസേനാംഗങ്ങൾ എന്നിവർ കാട്ടുതീ പ്രതിരോധപ്രവർത്തനങ്ങളിൽ സഹായിക്കുന്നുണ്ട്. അതേസമയം തീപിടുത്തം രൂക്ഷമായതിനെ തുടർന്ന് വാരാന്ത്യത്തിൽ നിരവധി വീടുകൾക്ക് കേടുപാടുകൾ സംഭവിച്ചതായി പ്രവിശ്യ തിങ്കളാഴ്ച സ്ഥിരീകരിച്ചു. നാശനഷ്ടങ്ങളുടെ കൃത്യമായ എണ്ണവും വ്യാപ്തിയും ഇതുവരെ സ്ഥിരീകരിച്ചിട്ടില്ല.
