ഫ്രെഡറിക്ടൺ : ന്യൂബ്രൺസ്വിക്ക് നിവാസികൾക്ക് അടുത്ത ദിവസം തങ്ങളുടെ ഫോണുകളിൽ എമർജൻസി അലേർട്ട് പ്രതീക്ഷിക്കാം. നവംബർ 19 ബുധനാഴ്ച രാവിലെ 10:55 ന് പബ്ലിക് അലേർട്ട് റെഡി എന്ന നാഷണൽ പബ്ലിക് അലേർട്ടിങ് സിസ്റ്റം പരീക്ഷിക്കുമെന്ന് ന്യൂബ്രൺസ്വിക്ക് സർക്കാർ അറിയിച്ചു. റേഡിയോ, ടെലിവിഷൻ, വയർലെസ് ഉപകരണങ്ങളിൽ ടെസ്റ്റ് അലേർട്ടുകൾ മുഴങ്ങും. ഫ്രഞ്ചിലും ഇംഗ്ലീഷിലുമായിരിക്കും സന്ദേശം ലഭിക്കുക.
നിർണായക ഘട്ടങ്ങളിൽ ആവശ്യമായ മുന്നറിയിപ്പുകൾ നൽകുന്നതിനായാണ് ‘അലർട്ട് റെഡി’ എന്ന സംവിധാനം രൂപകൽപ്പന ചെയ്തിരിക്കുന്നത്. കാനഡയിലുടനീളം മെയ്, നവംബർ മാസങ്ങളിൽ വർഷത്തിൽ രണ്ടുതവണയാണ് എമർജൻസി അലർട്ട് സിസ്റ്റം പരീക്ഷിക്കുന്നത്. ഈ സാങ്കേതികവിദ്യ എല്ലാ പ്ലാറ്റ്ഫോമുകളിലും പ്രവർത്തിക്കുന്നുണ്ടെന്ന് ഉറപ്പാക്കുക എന്ന ലക്ഷ്യത്തോടെയാണ് എമർജൻസി അലേർട്ട് നൽകുന്നതെന്ന് അലേർട്ട് റെഡി റെഗുലേറ്ററി അഫയേഴ്സ് ഡയറക്ടർ കുർട്ട് എബി അറിയിച്ചു. തീപിടിത്തം, പാരിസ്ഥിതിക ഭീഷണികള്, സിവിൽ എമർജൻസി, കാണാതാകുന്ന കുട്ടികൾക്കുള്ള ആംബർ അലർട്ട്, ചുഴലിക്കാറ്റ്, ഭൂകമ്പം, വെള്ളപ്പൊക്കം പോലുള്ള പ്രകൃതി ദുരന്തങ്ങൾ എന്നിവയുൾപ്പെടെ വിവിധ സാഹചര്യങ്ങളിൽ ഈ അലർട്ടുകൾ പ്രക്ഷേപണം ചെയ്യും. ഫെഡറൽ, പ്രൊവിൻഷ്യൽ, ടെറിട്ടോറിയൽ എമർജൻസി മാനേജ്മെൻ്റ് ഉദ്യോഗസ്ഥർ, എൻവയൺമെൻ്റ് ആൻഡ് ക്ലൈമറ്റ് ചേഞ്ച് കാനഡ, ബ്രോഡ് കാസ്റ്റ് ഇന്റസ്ട്രി എന്നിവയുമായി സഹകരിച്ചാണ് ‘അലർട്ട് റെഡി’ വികസിപ്പിച്ചത്.
