ന്യൂയോര്ക്ക്: അമേരിക്കയില് നടക്കാനിരിക്കുന്ന ഫിഫ ലേകകപ്പിന്റെ ഗ്രൂപ്പ് ഘട്ട നറുക്കെടുപ്പ് ഇന്ന്. ചടങ്ങില് വമ്പന് താരനിരയെയാണ് ഫിഫ അവതരിപ്പിക്കുന്നത്.
അമേരിക്കന് പ്രസിഡന്റ് ഡോണള്ഡ് ട്രംപും പങ്കെടുക്കും. ഫിഫയുടെ പ്രഥമ സമാധാന പുരസ്കാരവും ചടങ്ങില് പ്രഖ്യാപിച്ചേക്കാം.
വാഷിങ്ടനിലെ കെന്നഡി സെന്ററില് വെള്ളിയാഴ്ച ഇന്ത്യന് സമയം രാത്രി 10.30നാണ് പരിപാടി. ചടങ്ങില് ട്രംപിന്റെ ഇഷ്ടഗാനമായ വൈഎംസിഎ അവതരിപ്പിക്കും. ട്രംപിന്റെ തിരഞ്ഞെടുപ്പ് റാലികളിലും ധനസമാഹരണ പരിപാടികളിലും ഡിസ്കോ ബാന്ഡായ വില്ലേജ് പീപ്പിളിന്റെ വൈഎംസിഎ എന്ന ഗാനം സ്ഥിരം സാന്നിധ്യമായിരുന്നു. ഗാനത്തിനൊപ്പം ട്രംപ് നൃത്തം ചെയ്യുന്നതും പതിവായിരുന്നു.
ലോകകപ്പ് ഗ്രൂപ്പ് നറുക്കെടുപ്പ് ചടങ്ങിന് സമാപനം കുറിച്ചുകൊണ്ട്, ഡിസ്കോ ബാന്ഡ് ‘വില്ലേജ് പീപ്പിള്’ ഗാനം അവതരിപ്പിക്കും. സൂപ്പര് മോഡല് ഹൈഡി ക്ലം, ഹോളിവുഡ് താരങ്ങളായ കെവിന് ഹാര്ട്ട്, ഡാനി റാമിറസ്, ബ്രിട്ടിഷ് പോപ്പ് താരം റോബി വില്യംസ് തുടങ്ങിയവര് ചടങ്ങിന്റെ ഭാഗമാകും.
ഫിഫയുടെ പുതിയ പുരസ്കാരമായ ‘പീസ് പ്രൈസ് ഫുട്ബോള് യുണൈറ്റ്സ് ദ് വേള്ഡ്’ ചടങ്ങില് പ്രഖ്യാപിക്കാനും സാധ്യതയുണ്ട്. ട്രംപിനായിരിക്കും പുരസ്കാരം എന്നാണ് പ്രതീക്ഷിക്കുന്നത്. യുഎസ്, കാനഡ, മെക്സിക്കോ എന്നീ രാജ്യങ്ങളിലെ 16 നഗരങ്ങളിലായി അടുത്തവര്ഷം ജൂണ് 11 മുതല് ജൂലൈ 19 വരെയാണ് മത്സരങ്ങള്.
