ഓട്ടവ : സാമ്പത്തിക ലാഭം നോക്കിയുള്ള ക്രിസ്മസ് ഷോപ്പിങ്ങിനാണ് കാനഡക്കാർ ഇത്തവണ മുൻഗണന നൽകുന്നതെന്ന് റിപ്പോർട്ട്. കനേഡിയൻ നിർമ്മിത ഉൽപ്പന്നങ്ങളെ പിന്തുണയ്ക്കാൻ 73 ശതമാനം ആളുകൾ ആഗ്രഹിക്കുന്നുണ്ടെങ്കിലും, ഓൺലൈൻ വിപണിയിലെ വിലക്കുറവ് അവരെ മറ്റ് ബ്രാൻഡുകളിലേക്ക് ആകർഷിക്കുന്നതായി ബിസിനസ് പ്രൊഫസറായ എഡ് മക്ഹ്യൂ നിരീക്ഷിച്ചു. ചെലവ് കുറയ്ക്കുന്നതിനായി ഭക്ഷണപ്പൊതികൾ, സെക്കൻഡ് ഹാൻഡ് സാധനങ്ങൾ, സ്വന്തമായി നിർമ്മിച്ച സമ്മാനങ്ങൾ എന്നിവയ്ക്കാണ് ഈ സീസണിൽ കൂടുതൽ പ്രചാരം ലഭിക്കുന്നത്. വലിയ തുകകൾ ചെലവാക്കുന്നതിന് പകരം ക്രിസ്മസ് ആഘോഷങ്ങൾ ലളിതമാക്കാനാണ് ഭൂരിഭാഗം ഉപഭോക്താക്കളും ശ്രമിക്കുന്നതെന്ന് വ്യാപാരികളും പറയുന്നു.
കഴിഞ്ഞ വർഷം നടപ്പിലാക്കിയ ജിഎസ്ടി (GST) ഇളവ് ഇത്തവണ സർക്കാർ ഒഴിവാക്കിയത് വ്യാപാരികൾക്കും സാധാരണക്കാർക്കും വലിയ തിരിച്ചടിയായി. കളിപ്പാട്ടങ്ങൾക്കും ഭക്ഷണത്തിനും നൽകിയിരുന്ന നികുതി ഇളവ് മുൻപ് വിൽപ്പന വർധിപ്പിക്കാൻ സഹായിച്ചിരുന്നു. എന്നാൽ സർക്കാർ വരുമാന നഷ്ടം ഒഴിവാക്കാൻ ഈ ആനുകൂല്യം പിൻവലിക്കുകയായിരുന്നു. ചെറുകിട വ്യാപാര മേഖല കടുത്ത വെല്ലുവിളികൾ നേരിടുന്ന ഈ സമയത്ത് ഇത്തരം ആനുകൂല്യങ്ങൾ ആവശ്യമായിരുന്നുവെന്ന് സാമ്പത്തിക വിദഗ്ധർ അഭിപ്രായപ്പെടുന്നു.
