ഷാർലെറ്റ് ടൗൺ: പ്രിൻസ് എഡ്വേർഡ് ഐലൻഡിലെ (P.E.I.) ഫുഡ് ബാങ്കുകളിൽ സഹായം തേടിയെത്തുന്നവരുടെ എണ്ണത്തിൽ വൻ വർധന. ഷാർലറ്റ് ടൗണിലെ അപ്പർ റൂം ഹോസ്പിറ്റാലിറ്റി മിനിസ്ട്രി ഈ വർഷം 1,200-ഓളം ക്രിസ്മസ് കിറ്റുകളാണ് വിതരണം ചെയ്തത്. നിത്യോപയോഗ സാധനങ്ങളുടെ വിലക്കയറ്റവും ഉയർന്ന വീട്ടുവാടകയുമാണ് സാധാരണക്കാരെ ഇതിലേക്ക് നയിക്കുന്നത്.
ജോലിയുള്ള കുടുംബങ്ങൾ പോലും ഭക്ഷണത്തിനായി സഹായം തേടുന്നു എന്നതാണ് ഈ വർഷത്തെ പ്രത്യേകത. ഫുഡ് ബാങ്കുകളെ ആശ്രയിക്കുന്നവരിൽ 35 ശതമാനത്തോളം പേരും സ്ഥിരമായി ജോലി ചെയ്യുന്നവരാണെന്ന് അധികൃതർ ചൂണ്ടിക്കാട്ടി. ഇതിനുപുറമെ, നിശ്ചിത വരുമാനത്തിൽ ജീവിക്കുന്ന പ്രായമായവരും വലിയ സാമ്പത്തിക പ്രതിസന്ധി നേരിടുന്നുണ്ട്. 2019-ന് ശേഷം ഭക്ഷണത്തിനായുള്ള ആവശ്യകതയിൽ 110 % വർധനയാണ് ഉണ്ടായത്. സമ്മർസൈഡിലെ സാൽവേഷൻ ആർമിയും സമാനമായ സാഹചര്യമാണ് നേരിടുന്നത്. ഭക്ഷ്യ വസ്തുക്കൾ ദാനം നൽകി ഈ പ്രതിസന്ധി ഘട്ടത്തിൽ ഒപ്പം നിൽക്കണമെന്ന് സന്നദ്ധ സംഘടനകൾ പൊതുജനങ്ങളോട് അഭ്യർത്ഥിച്ചിട്ടുണ്ട്.
