മൺട്രിയോൾ : തിങ്കളാഴ്ച മൺട്രിയോളിലും തെക്കൻ കെബെക്കിന്റെ ഭൂരിഭാഗം പ്രദേശങ്ങളിലും ശക്തമായ മഞ്ഞുമഴയ്ക്ക് സാധ്യതയുള്ളതായി എൻവയൺമെന്റ് കാനഡയുടെ മുന്നറിയിപ്പ്. ഞായറാഴ്ച രാത്രി മുതൽ തിങ്കളാഴ്ച വൈകിട്ട് വരെ നീണ്ടുനിൽക്കുന്ന ഈ പ്രതിഭാസം റോഡ് യാത്രകൾ ദുഷ്കരമാക്കാനും അപകടങ്ങൾക്കും കാരണമായേക്കാം. മൺട്രിയോളിന് പുറമെ ഔട്ടാവായിസ്, ലോറൻ്റൈഡ്സ്, ഈസ്റ്റേൺ ടൗൺഷിപ്പ്സ് തുടങ്ങിയ മേഖലകളിലും ജാഗ്രതാ നിർദ്ദേശം ബാധകമാണ്.
മഞ്ഞ് അടിഞ്ഞുകൂടുന്നത് മരച്ചില്ലകൾ ഒടിഞ്ഞു വീഴുന്നതിനും വൈദ്യുതി ബന്ധം തകരാറിലാകുന്നതിനും കാരണമാകുന്നതിനാൽ ജനങ്ങൾ അതീവ ശ്രദ്ധ പുലർത്തണമെന്നും അധികൃതർ അറിയിച്ചു. കാലാവസ്ഥാ സാഹചര്യങ്ങൾ കണക്കിലെടുത്ത് അത്യാവശ്യമല്ലാത്ത യാത്രകൾ ഒഴിവാക്കണമെന്നും നിർദ്ദേശമുണ്ട്. മഞ്ഞുമഴയുടെ തീവ്രതയിലും സമയത്തിലും മാറ്റങ്ങൾ വരാമെന്നും കാലാവസ്ഥാ നിരീക്ഷണ കേന്ദ്രം വ്യക്തമാക്കി.
