സാസ്കറ്റൂൺ : വിന്റർ വിനോദങ്ങൾ ആസ്വദിക്കാനെത്തുന്ന സന്ദർശകരെ സ്വീകരിക്കാനൊരുങ്ങി പ്രിൻസ് ആൽബർട്ട് ലിറ്റിൽ റെഡ് റിവർ പാർക്ക്. ശൈത്യകാല അവധി ആഘോഷിക്കാനും മഞ്ഞിലെ കളികളിൽ ഏർപ്പെടാനും പ്രിൻസ് ആൽബർട്ടിൽ നിന്നും പരിസര പ്രദേശങ്ങളിൽ നിന്നും ധാരാളം കുടുംബങ്ങൾ പാർക്കിലേക്ക് എത്തുന്നതായി അധികൃതർ അറിയിച്ചു. നഗരസഭയുടെ കീഴിലുള്ള ഈ കൂറ്റൻ പാർക്കിലെ സൗകര്യങ്ങൾ അടുത്തിടെ വിപുലീകരിച്ചത് കൂടുതൽ സൗകര്യപ്രദമായതായി സന്ദർശകർ പറയുന്നു.
കാനഡയിലെ തന്നെ ഏറ്റവും കൂടുതൽ ഹരിതാഭമായ പ്രദേശമുള്ള നഗരങ്ങളിലൊന്നായ പ്രിൻസ് ആൽബർട്ടിലെ ഈ പാർക്ക് 1,200 ഏക്കറിലധികം വിസ്തൃതിയിലാണ് വ്യാപിച്ചുകിടക്കുന്നത്. സ്കീയിങ്, സ്നോ ബോർഡിങ് എന്നിവയ്ക്കുള്ള സൗകര്യങ്ങൾക്കു പുറമെ 45 കിലോമീറ്ററോളം നീളമുള്ള ക്രോസ് കൺട്രി സ്കീ ട്രയലുകളും ഇവിടെയുണ്ട്. വന്യമൃഗങ്ങളെ കാണാനും പ്രകൃതിഭംഗി ആസ്വദിക്കാനും കഴിയുന്ന ഈ പ്രദേശം വിനോദസഞ്ചാരികളുടെ പ്രധാന ആകർഷണ കേന്ദ്രമായി മാറിക്കഴിഞ്ഞു.
