എഡ്മിന്റൻ: ആൽബർട്ട പ്രവിശ്യയിൽ ശ്വസനസംബന്ധമായ വൈറസ് രോഗങ്ങൾ പടരുന്ന പശ്ചാത്തലത്തിൽ ചീഫ് മെഡിക്കൽ ഓഫീസർ ഇന്ന് സ്ഥിതിഗതികൾ വിശദീകരിക്കും. ഇൻഫ്ലുവൻസ കേസുകൾ വലിയ തോതിൽ വർധിച്ചതിനെത്തുടർന്ന് പ്രവിശ്യയിലെ ആശുപത്രി സംവിധാനങ്ങൾ കടുത്ത സമ്മർദ്ദത്തിലായിരിക്കെയാണ് തീരുമാനം. എമർജൻസി റൂമുകളിലെ അമിതമായ തിരക്കും നീണ്ട കാത്തിരിപ്പും ഒഴിവാക്കാൻ അടിയന്തര നടപടികൾ വേണമെന്ന് ആരോഗ്യരംഗത്തെ വിദഗ്ധർ ആവശ്യപ്പെട്ടിട്ടുണ്ട്.
ഡിസംബർ പകുതിയോടെ ഇൻഫ്ലുവൻസ കേസുകളിൽ ഉണ്ടായ അപ്രതീക്ഷിതവും വലുതുമായ വർധനവാണ് ആശുപത്രികളിൽ തിരക്ക് കൂടാൻ കാരണമെന്ന് ആരോഗ്യ മന്ത്രാലയം അറിയിച്ചു. ജനുവരി 3-ലെ കണക്കുകൾ പ്രകാരം, ഇൻഫ്ലുവൻസ ബാധിച്ച് 653 പേർ വിവിധ ആശുപത്രികളിൽ ചികിത്സയിലാണ്. ഇതിൽ 51 പേരുടെ നില ഗുരുതരമായതിനാൽ തീവ്രപരിചരണ വിഭാഗത്തിൽ (ICU) പ്രവേശിപ്പിച്ചിരിക്കുകയാണ്.
കഴിഞ്ഞ നാല് വർഷത്തെ അപേക്ഷിച്ച് ജനുവരി ആദ്യവാരത്തിൽ ആശുപത്രിയിൽ പ്രവേശിപ്പിക്കപ്പെട്ട രോഗികളുടെ എണ്ണത്തിൽ റെക്കോർഡ് വർധനവാണ് ഇത്തവണ രേഖപ്പെടുത്തിയിരിക്കുന്നത്. ഈ സീസണിൽ ഇതുവരെ ഇൻഫ്ലുവൻസ ബാധിച്ച് 133 പേർക്ക് ജീവൻ നഷ്ടമായതായും റിപ്പോർട്ടുകൾ വ്യക്തമാക്കുന്നു.
