ഓട്ടവ: കാനഡയിലെ പണപ്പെരുപ്പ നിരക്ക് 2.4 ശതമാനമായി ഉയർന്നു. ഡിസംബറിലെ ഉപഭോക്തൃ വിലസൂചിക പ്രകാരം സ്റ്റാറ്റിസ്റ്റിക്സ് കാനഡ പുറത്തുവിട്ട കണക്കുകൾ പ്രകാരമാണിത്. നവംബറിൽ ഇത് 2.2 ശതമാനമായിരുന്നു. 2024 ഡിസംബറിൽ ഫെഡറൽ സർക്കാർ ചില ഉൽപ്പന്നങ്ങൾക്ക് ജി.എസ്.ടി ഒഴിവാക്കിയിരുന്നു. എന്നാൽ ഈ വർഷം ആ ഇളവുകൾ ഇല്ലാത്തതിനാൽ മുൻവർഷങ്ങളെ അപേക്ഷിച്ച് വില വർധനയുണ്ടായി. ഹോട്ടൽ ഭക്ഷണ വിലയിൽ 8.5 ശതമാനം വർധനയുണ്ടായപ്പോൾ പലചരക്ക് സാധനങ്ങളുടെ വില 5 ശതമാനത്തോളം ഉയർന്നു. ഡിസംബറിൽ കാപ്പിയുടെ വില 30 ശതമാനത്തിലധികം ഉയർന്നതായും പുതിയതോ ശീതീകരിച്ചതോ ആയ ബീഫിന്റെ വില 16.8 ശതമാനം വർധിച്ചതായും ഏജൻസി അറിയിച്ചു. ഡിസംബറിലെ പണപ്പെരുപ്പ വർധനയ്ക്ക് പിന്നാലെ പെട്രോൾ വിലയിൽ 13.8 ശതമാനം കുറവ് രേഖപ്പെടുത്തിയതായി സ്റ്റാറ്റ്കാൻ പറഞ്ഞു. ആഗോളതലത്തിൽ അസംസ്കൃത എണ്ണയുടെ അമിത ലഭ്യതയാണ് വില കുറയാൻ കാരണമായത്. വിമാനടിക്കറ്റ് നിരക്കുകൾ മാസങ്ങൾക്കിടയിൽ 34.5 ശതമാനം വരെ ഉയരത്തിലേക്ക് കുതിച്ചു.
അതേ സമയം ഇന്ധനവിലയിൽ കഴിഞ്ഞ വർഷത്തെ അപേക്ഷിച്ച് 13.8 ശതമാനം കുറവുണ്ടായത് പണപ്പെരുപ്പ നിരക്ക് ഒരു പരിധിക്കപ്പുറത്തേക്ക് ഉയരാതെ പിടിച്ചു നിറുത്താൻ സഹായിച്ചു. അന്താരാഷ്ട്ര വിപണിയിൽ അസംസ്കൃത എണ്ണയുടെ ലഭ്യത കൂടിയതാണ് ഇതിന് കാരണമായത്. ബാങ്ക് ഓഫ് കാനഡ അടുത്ത ആഴ്ച പലിശ നിരക്കുകൾ പ്രഖ്യാപിക്കാനിരിക്കെയാണ് പണപ്പെരുപ്പ കണക്കുകൾ പുറത്തുവിട്ടത്. ഡിസംബറിൽ സെൻട്രൽ ബാങ്ക് അതിന്റെ ബെഞ്ച്മാർക്ക് പലിശ നിരക്ക് 2.25 ശതമാനത്തിൽ സ്ഥിരമായി നിലനിറുത്തിയിരുന്നു.
