സെന്റ് ജോൺസ് : ന്യൂഫിൻലൻഡ് ആൻഡ് ലാബ്രഡോറിൽ കനത്ത മഞ്ഞുവീഴ്ചയും മഴയും തുടരുന്ന സാഹചര്യത്തിൽ അതീവ ജാഗ്രതാ നിർദ്ദേശം നൽകി എൻവയൺമെന്റ് കാനഡ. തിങ്കളാഴ്ച രാവിലെ മഞ്ഞുവീഴ്ചയോടെ തുടങ്ങിയ മഞ്ഞുവീഴ്ച, പിന്നീട് ആലിപ്പഴ വീഴ്ചയായും ഫ്രീസിങ് റെയ്നായും മാറുമെന്ന് കാലാവസ്ഥാ നിരീക്ഷകർ അറിയിച്ചു. അവലോൺ പെനിൻസുലയുടെ തെക്കൻ ഭാഗങ്ങളിൽ 30 മില്ലിമീറ്റർ വരെ മഴ ലഭിക്കാൻ സാധ്യതയുള്ളതിനാൽ റെയിൻഫാൾ മുന്നറിയിപ്പും നൽകിയിട്ടുണ്ട്.
മഞ്ഞുവീഴ്ചയ്ക്കും മഴയ്ക്കും ഒപ്പം അതിശക്തമായ കാറ്റും ഈ മേഖലയിൽ വീശാൻ സാധ്യതയുണ്ട്. തീരപ്രദേശങ്ങളിൽ മണിക്കൂറിൽ 80 മുതൽ 100 കിലോമീറ്റർ വരെ വേഗതയിൽ കാറ്റുവീശിയേക്കാമെന്ന് ഏജൻസി അറിയിച്ചു. ബോണവിസ്റ്റ പെനിൻസുലയിൽ 10 സെന്റിമീറ്റർ വരെ മഞ്ഞുവീഴ്ചയ്ക്കും സാധ്യതയുണ്ട്. മോശം കാലാവസ്ഥ കാരണം റോഡ് യാത്രകൾ അപകടകരമാകാൻ സാധ്യതയുള്ളതിനാൽ പൊതുജനങ്ങൾ അതീവ ജാഗ്രത പാലിക്കണമെന്ന് അധികൃതർ നിർദ്ദേശിച്ചു. വൈകുന്നേരത്തോടെ കാറ്റിന്റെ വേഗത കുറയുമെന്നാണ് പ്രതീക്ഷിക്കുന്നത്.
