ഹാലിഫാക്സ്: കാനഡയിലെ അറ്റ്ലാന്റിക് മേഖലയിലെ വളർന്നുവരുന്ന ഹൈഡ്രജൻ ഇന്ധന വിപണിക്ക് കരുത്തേകി യൂറോപ്യൻ യൂണിയന്റെ വൻ നിക്ഷേപം. കാനഡയിൽ നിന്നുള്ള പുനരുപയോഗ ഹൈഡ്രജൻ ഉൽപ്പാദനത്തിനും കയറ്റുമതിക്കുമായി 20 കോടി യൂറോയുടെ സാമ്പത്തിക സഹായത്തിന് യൂറോപ്യൻ കമ്മീഷൻ അംഗീകാരം നൽകി. ജർമ്മനിയിലേക്കുള്ള ഇന്ധന കയറ്റുമതി ലക്ഷ്യമിട്ടുള്ള ഈ പദ്ധതി, കാനഡയിൽ നിന്ന് തുല്യമായ തുകയുടെ അധിക നിക്ഷേപം കൂടി ഈ മേഖലയിലേക്ക് ആകർഷിക്കുമെന്ന് അധികൃതർ വ്യക്തമാക്കി.
2027-ഓടെ ഹൈഡ്രജൻ വിതരണക്കാർക്കും ഉപഭോക്താക്കൾക്കുമായി ലേല നടപടികൾ ആരംഭിക്കും. ഏകദേശം 300 മെഗാവാട്ട് ഊർജ്ജം ഇത്തരത്തിൽ വിപണിയിലെത്തിക്കാനാണ് ലക്ഷ്യമിടുന്നത്. ഈ പദ്ധതി നടപ്പിലാക്കുന്നതിലൂടെ അന്തരീക്ഷത്തിലെ കാർബൺ ഡൈ ഓക്സൈഡിന്റെ അളവിൽ 2.5 മില്യൺ ടണ്ണിന്റെ കുറവുണ്ടാക്കാൻ സാധിക്കുമെന്ന് ജർമ്മനി അറിയിച്ചു. നോവസ്കോഷയിലെ പോയിന്റ് ടപ്പറിൽ ഹൈഡ്രജൻ പ്ലാന്റ് നിർമ്മിക്കുന്ന എവർവിൻഡ് ഫ്യൂവൽസ് (Everwind Fuels) പോലുള്ള കമ്പനികൾക്ക് ഈ നിക്ഷേപം വലിയ ആശ്വാസമാണ്. പുതിയ സാമ്പത്തിക സഹായം ദീർഘകാല കയറ്റുമതി കരാറുകളിൽ ഏർപ്പെടാൻ കമ്പനിയെ സഹായിക്കും.
യുക്രെയ്ൻ അധിനിവേശത്തെത്തുടർന്ന് റഷ്യൻ ഊർജ്ജ സ്രോതസ്സുകളെ ആശ്രയിക്കുന്നത് കുറയ്ക്കുന്നതിനായി 2022-ലാണ് കാനഡയും ജർമ്മനിയും ശുദ്ധമായ ഹൈഡ്രജൻ ഉൽപ്പാദനത്തിനായി കൈകോർത്തത്. ആഗോള പരിസ്ഥിതി സൗഹൃദ ഊർജ്ജ വിപണിയിൽ കാനഡയുടെ സ്ഥാനം ഉറപ്പിക്കുന്നതിനൊപ്പം യൂറോപ്പിന്റെ ഊർജ്ജ സുരക്ഷ ഉറപ്പാക്കാനും ഈ സഹകരണം ലക്ഷ്യമിടുന്നു. അറ്റ്ലാന്റിക് കാനഡയിലെ ഹൈഡ്രജൻ മേഖലയിലുള്ള കമ്പനികൾ ഈ നീക്കത്തെ വലിയ ആവേശത്തോടെയാണ് സ്വാഗതം ചെയ്തിരിക്കുന്നത്.