വാഷിങ്ടണ്: ഇറാന്- അമേരിക്ക ആണവ ചര്ച്ചകള്ക്കു പിന്നാലെ ഇറാന്റെ ഊര്ജമേഖലയ്ക്ക് മേല് കൂടുതല് ഉപരോധങ്ങള് ഏര്പ്പെടുത്തി അമേരിക്ക.
14 എണ്ണ ടാങ്കറുകള്, 15 വ്യാപാര സ്ഥാപനങ്ങള്, രണ്ട് ബിസിനസ് എക്സിക്യൂട്ടീവുകള് എന്നിവര്ക്കെതിരെയാണ് അമേരിക്കന് സ്റ്റേറ്റ് ഡിപ്പാര്ട്ട്മെന്റും ട്രഷറി ഡിപ്പാര്ട്ട്മെന്റും പുതിയ നിയന്ത്രണങ്ങള് ഏര്പ്പെടുത്തിയത്. ഇറാന്റെ ‘ഷാഡോ ഫ്ലീറ്റ്’ (Shadow Fleet) വഴിയുള്ള അനധികൃത എണ്ണക്കടത്ത് തടയുക എന്ന ലക്ഷ്യത്തോടെയാണ് ഈ നടപടി.
യുറേനിയം സമ്പുഷ്ടീകരണം പൂര്ണ്ണമായും അവസാനിപ്പിക്കണമെന്ന അമേരിക്കയുടെ കര്ശനമായ ആവശ്യം ഇറാന് നിരാകരിച്ചതായാണ് സൂചന. യുറേനിയം സമ്പുഷ്ടീകരിക്കാനുള്ള അവകാശം തങ്ങള്ക്കുണ്ടെന്നും എന്നാല് അതിന്റെ അളവിനെക്കുറിച്ചും പരിശുദ്ധിയെക്കുറിച്ചും (level and purity) ചര്ച്ചയാകാമെന്നുമാണ് ഇറാന്റെ നിലപാട്. അതേസമയം, ചര്ച്ചകളില് ഇറാന്റെ മിസൈല് പ്രോഗ്രാമോ പ്രാദേശിക ഗ്രൂപ്പുകള്ക്കുള്ള പിന്തുണയോ വിഷയമായില്ലെന്ന് റിപ്പോര്ട്ടുകള് വ്യക്തമാക്കുന്നു.
മസ്കറ്റില് നടന്ന ആദ്യദിന ചര്ച്ചകള്ക്ക് ശേഷം ഇറാന് വിദേശകാര്യമന്ത്രി അബ്ബാസ് അരഘ്ചി ശുഭാപ്തിവിശ്വാസം പ്രകടിപ്പിച്ചു. ചര്ച്ചകള്ക്ക് നല്ലൊരു തുടക്കമാണ് ലഭിച്ചതെന്നും ഒരു പോസിറ്റീവ് ഫ്രെയിംവര്ക്കിലേക്ക് എത്താന് കഴിയുമെന്ന് പ്രതീക്ഷിക്കുന്നതായും അദ്ദേഹം പറഞ്ഞു. അമേരിക്കയുടെ പശ്ചിമേഷ്യന് പ്രതിനിധി സ്റ്റീവ് വിറ്റ്കോഫ്, പ്രസിഡന്റ് ട്രംപിന്റെ മരുമകന് ജാരെദ് കഷ്നര് എന്നിവരാണ് അമേരിക്കന് സംഘത്തെ നയിച്ചത്. നയതന്ത്രപരവും സാങ്കേതികവുമായ ചര്ച്ചകള് തുടരാന് അനുകൂലമായ സാഹചര്യം ഒരുക്കുന്നതിലായിരുന്നു ആദ്യഘട്ട ചര്ച്ചകള് കേന്ദ്രീകരിച്ചതെന്ന് മധ്യസ്ഥത വഹിച്ച ഒമാന് വിദേശകാര്യ മന്ത്രാലയം അറിയിച്ചു.
ഒമാന് വിദേശകാര്യമന്ത്രി സയ്യിദ് ബദര് അല്ബുസൈദി ഇരുവിഭാഗങ്ങളുമായും പ്രത്യേകം ചര്ച്ചകള് നടത്തി. ചര്ച്ചകള് അതീവ ഗൗരവകരമാണെന്നും രണ്ട് രാജ്യങ്ങളുടെയും തലസ്ഥാനങ്ങളില് (വാഷിങ്ടണ്, ടെഹ്റാന്) ചര്ച്ചാ ഫലങ്ങള് അവലോകനം ചെയ്ത ശേഷം അടുത്ത ഘട്ടത്തിലേക്ക് നീങ്ങുമെന്നും അദ്ദേഹം വ്യക്തമാക്കി. ഒരു വശത്ത് ഉപരോധങ്ങള് കടുപ്പിക്കുമ്പോഴും മറുവശത്ത് ചര്ച്ചകള് തുടരുന്നത് പശ്ചിമേഷ്യയിലെ യുദ്ധഭീതി കുറയ്ക്കാന് സഹായിക്കുമെന്നാണ് ആഗോള നിരീക്ഷകരുടെ വിലയിരുത്തല്.
