ഓട്ടവ: പോപ് താരം കാറ്റി പെറിയും മുൻ കനേഡിയൻ പ്രധാനമന്ത്രി ജസ്റ്റിൻ ട്രൂഡോയും മഞ്ഞുമൂടിയ പർവത മേഖലയിൽ ഒരുമിച്ച് സ്കീയിംങ് നടത്തുന്ന ചിത്രങ്ങൾ പുറത്ത്. കാറ്റി പെറിയും ജസ്റ്റിൻ ട്രൂഡോയും കറുത്ത വസ്ത്രം ധരിച്ച് , മഞ്ഞുമൂടിയ പർവത പശ്ചാത്തലത്തിൽ, ഒരുമിച്ച് സ്കീയിങ് ആസ്വദിക്കുന്ന ചിത്രമാണ് പുറത്തുവിട്ടത്.
കഴിഞ്ഞ ജൂലൈയിലാണ് കാറ്റി പെറിയും ജസ്റ്റിൻ ട്രൂഡോയും ആദ്യമായി ഒരുമിച്ച് പ്രത്യക്ഷപ്പെടുന്നത് മാധ്യമങ്ങളുടെ ശ്രദ്ധയിൽപ്പെട്ടത്. ഡിസംബറിൽ, 41 കാരിയായ പോപ്പ് താരം ജസ്റ്റിൻ ട്രൂഡോയുമായുള്ള തന്റെ ബന്ധം ഇൻസ്റ്റാഗ്രാമിൽ ഔദ്യോഗികമാക്കി. അടുത്തിടെ, കാറ്റി പെറി സോഷ്യൽ മീഡിയയിൽ ജസ്റ്റിൻ ട്രൂഡോയ്ക്കൊപ്പമുള്ള സെൽഫിയും വിഡിയോയും പങ്കിട്ടു.
മുൻ ജാപ്പനീസ് പ്രധാനമന്ത്രി ഫ്യൂമിയോ കിഷിദയ്ക്കും ഭാര്യ യോക്കോയ്ക്കുമൊപ്പമുള്ള വിരുന്നിന് ശേഷം കാറ്റി പെറി ജസ്റ്റിൻ ട്രൂഡോയ്ക്കൊപ്പമുള്ള ചിത്രം പങ്കിട്ടിരുന്നു. ജൂലൈയിൽ മൺട്രിയോളിൽ ഒരു അത്താഴവിരുന്നിനിടെയാണ് പെറിയും ട്രൂഡോയും ആദ്യമായി ഒരുമിച്ച് കണ്ടത്. കാനഡയിലെ തന്റെ ലൈഫ് ടൈംസ് ടൂർ പ്രകടനത്തിലും ട്രൂഡോ പങ്കെടുത്തു. 18 വർഷത്തെ ദാമ്പത്യജീവിതത്തിനുശേഷം 2023 ഓഗസ്റ്റിൽ ട്രൂഡോ ഭാര്യ സോഫി ഗ്രിഗോയറിൽ നിന്ന് വേർപിരിയുന്നതായി പ്രഖ്യാപിച്ചു. അവർക്ക് മൂന്ന് കുട്ടികളുണ്ട്. കാറ്റി പെറിയും ഒർലാൻഡോ ബ്ലൂമും 2019 ഫെബ്രുവരിയിൽ വിവാഹനിശ്ചയം നടത്തി. 2020 ഓഗസ്റ്റിൽ മകൾ ജനിച്ചു. 2025 ജൂണിൽ ഈ ദമ്പതികൾ അവരുടെ ഒമ്പത് വർഷത്തെ ബന്ധം അവസാനിപ്പിച്ചു.
