ഓട്ടവ : രാജ്യത്തുടനീളമുള്ള കനേഡിയൻ കുടുംബങ്ങൾ കാത്തിരിക്കുന്ന, ഈ വർഷത്തെ രണ്ടാമത്തെ കാനഡ ചൈൽഡ് ബെനിഫിറ്റ് (CCB) ഫെബ്രുവരി 20 വെള്ളിയാഴ്ച വിതരണം ചെയ്യുമെന്ന് കാനഡ റവന്യൂ ഏജൻസി (CRA) അറിയിച്ചു. ഉയർന്ന ജീവിതച്ചെലവുകൾ കാരണം ഗാർഹിക ബജറ്റുകൾ താളം തെറ്റുന്ന ഈ കാലത്ത് 18 വയസ്സിന് താഴെയുള്ള കുട്ടികളെ വളർത്തുന്ന ലക്ഷക്കണക്കിന് മാതാപിതാക്കൾക്കും രക്ഷിതാക്കൾക്കും ഈ നികുതി രഹിത പ്രതിമാസ പേയ്മെൻ്റ് സാമ്പത്തിക സഹായമാണ് നൽകുന്നത്.
അപേക്ഷകരുടെ വരുമാനവും കുട്ടികളുടെ പ്രായവും അനുസരിച്ചായിരിക്കും തുക അനുവദിക്കുക. 2025 ജൂലൈയിൽ കാനഡ ചൈൽഡ് ബെനിഫിറ്റ് തുക ഏകദേശം 2.7% വർധിപ്പിച്ചിരുന്നു. ഇതോടെ ആറ് വയസ്സിന് താഴെയുള്ള കുട്ടികൾക്കുള്ള പരമാവധി വാർഷിക ആനുകൂല്യം ഇപ്പോൾ ഒരു കുട്ടിക്ക് 7,997 ഡോളർ ആണ്. അതേസമയം ആറ് മുതൽ 17 വയസ്സ് വരെ പ്രായമുള്ള കുട്ടികൾക്ക് പരമാവധി ലഭിക്കുന്ന തുക ഒരു കുട്ടിക്ക് 6,748 ഡോളർ ആയിരിക്കും. മാർച്ച് 20, ഏപ്രിൽ 20, മെയ് 20, ജൂൺ 19, ജൂലൈ 20, ഓഗസ്റ്റ് 20, സെപ്റ്റംബർ 18, ഒക്ടോബർ 20, നവംബർ 20, ഡിസംബർ 11 എന്നീ തീയതികളിലാണ് ഇനി കാനഡ ചൈൽഡ് ബെനിഫിറ്റ് വിതരണം ചെയ്യുക.
