വാഷിങ്ടണ്: ആണവ പദ്ധതിയുമായി ബന്ധപ്പെട്ട് നിലനില്ക്കുന്ന തര്ക്കങ്ങളില് അന്തിമ ധാരണയിലെത്താന് ഇറാന് 10 മുതല് 15 ദിവസം വരെ സമയപരിധി നിശ്ചയിച്ച് അമേരിക്കന് പ്രസിഡന്റ് ഡോണള്ഡ് ട്രംപ്. വാഷിങ്ടണില് നടന്ന ‘ബോര്ഡ് ഓഫ് പീസ്’ (Board of Peace) എന്ന സമാധാന കൗണ്സിലിന്റെ ആദ്യ യോഗത്തിലാണ് ട്രംപിന്റെ നിര്ണ്ണായകമായ ഈ പ്രഖ്യാപനം ഉണ്ടായത്. നിശ്ചയിച്ച സമയത്തിനുള്ളില് കരാറിലെത്താന് ഇറാന് പരാജയപ്പെട്ടാല് ‘വളരെ മോശമായ കാര്യങ്ങള്’ സംഭവിക്കുമെന്ന് ട്രംപ് മുന്നറിയിപ്പ് നല്കി.
ഇറാന് യുദ്ധത്തിന് താല്പര്യപ്പെടുന്നില്ലെന്നും എന്നാല് അമേരിക്ക ആക്രമിക്കാന് തുനിഞ്ഞാല് സ്വയം പ്രതിരോധത്തിനുള്ള അവകാശം ഉപയോഗിക്കുമെന്നും ടെഹ്റാന് വ്യക്തമാക്കിയിട്ടുണ്ട്. യുഎന് സെക്രട്ടറി ജനറല് അന്റോണിയോ ഗുട്ടെറസിന് അയച്ച കത്തിലാണ് ഇറാന്റെ ഈ നിലപാട്. ആക്രമണമുണ്ടായാല് മേഖലയിലെ അമേരിക്കയുടെ എല്ലാ സൈനിക താവളങ്ങളെയും ലക്ഷ്യം വയ്ക്കുമെന്നും അവര് മുന്നറിയിപ്പ് നല്കി. ഇതിനിടെ, ഹോര്മൂസ് കടലിടുക്കില് ഇറാനും റഷ്യയും സംയുക്ത സൈനിക അഭ്യാസം നടത്തിയത് മേഖലയില് കൂടുതല് സംഘര്ഷഭീതി പടര്ത്തിയിട്ടുണ്ട്. യുദ്ധസാധ്യത മുന്നിര്ത്തി ആഗോള വിപണിയില് എണ്ണവില വര്ധിക്കുകയും ചെയ്തു.
അമേരിക്ക ഇറാനെതിരെ പുതിയ സൈനിക നീക്കങ്ങള് നടത്തുന്നത് ഗുരുതരമായ പ്രത്യാഘാതങ്ങള് ഉണ്ടാക്കുമെന്ന് റഷ്യന് വിദേശകാര്യ മന്ത്രി സെര്ജി ലാവ്റോവ് മുന്നറിയിപ്പ് നല്കി. ജനീവയില് അമേരിക്കയും ഇറാനും തമ്മില് പരോക്ഷ ചര്ച്ചകള് നടന്നതിന് പിന്നാലെയായിരുന്നു ലാവ്റോവിന്റെ ഇടപെടല്. ഇറാനിലെ ആണവ കേന്ദ്രങ്ങള്ക്ക് നേരെ മുന്പ് നടന്ന ആക്രമണങ്ങള് അന്താരാഷ്ട്ര ആണവോര്ജ്ജ ഏജന്സിയുടെ (IAEA) നിരീക്ഷണത്തിലുള്ള മേഖലകളെ ബാധിച്ചുവെന്നും, ഇത് വലിയൊരു ആണവ ദുരന്തത്തിന് വഴിവെക്കാമായിരുന്നെന്നും ലാവ്റോവ് ചൂണ്ടിക്കാട്ടി.
പശ്ചിമേഷ്യന് തീരത്ത് അമേരിക്ക സൈനിക സന്നാഹം ശക്തമാക്കിയിട്ടുണ്ട്. ഇറാനെ ആക്രമിക്കാന് ഇന്ത്യന് മഹാസമുദ്രത്തിലെ ഡിഗോ ഗാര്ഷ്യ (Diego Garcia) സൈനികതാവളം അമേരിക്ക ഉപയോഗിച്ചേക്കുമെന്നാണ് റിപ്പോര്ട്ടുകള് സൂചിപ്പിക്കുന്നത്. ആണവ പദ്ധതി പൂര്ണ്ണമായും ഉപേക്ഷിക്കുന്ന കാര്യത്തില് ഇരു രാജ്യങ്ങളും തമ്മില് കടുത്ത ഭിന്നിപ്പിലാണെന്ന് വൈറ്റ് ഹൗസ് വക്താവ് കരോലിന് ലെവിറ്റ് വ്യക്തമാക്കി. ഫെബ്രുവരി 28-ന് ഇസ്രയേല് പ്രധാനമന്ത്രി ബെഞ്ചമിന് നെതന്യാഹുവും അമേരിക്കന് സ്റ്റേറ്റ് സെക്രട്ടറി മാര്ക്കോ റൂബിയോയും ഇറാന് വിഷയത്തില് വിശദമായ ചര്ച്ച നടത്തും.
