വാഷിങ്ടൺ : അമേരിക്കൻ സർക്കാരിന്റെ ഭാഗികമായ അടച്ചുപൂട്ടലിനെത്തുടർന്ന് യുഎസിലേക്കുള്ള നെക്സസ്, ഗ്ലോബൽ എൻട്രി എന്നീ മുൻകൂർ ക്ലിയറൻസ് സേവനങ്ങൾ റദ്ദാക്കിയതായി കനേഡിയൻ വിമാനത്താവളങ്ങൾ. ഫെബ്രുവരി 14 മുതൽ പ്രാബല്യത്തിൽ വന്ന യുഎസ് ഭരണസ്തംഭനത്തെത്തുടർന്ന് സുരക്ഷാ പരിശോധനകളിൽ കാലതാമസം നേരിടാൻ സാധ്യതയുള്ളതിനാൽ വൻകൂവർ, ടൊറന്റോ, കാൽഗറി, മൺട്രിയോൾ വിമാനത്താവളങ്ങൾ വഴി യാത്ര ചെയ്യുന്നവർ നേരത്തെ എത്തണമെന്ന് അധികൃതർ നിർദ്ദേശിച്ചു. ഡിപ്പാർട്ട്മെന്റ് ഓഫ് ഹോംലാൻഡ് സെക്യൂരിറ്റിക്കുള്ള ഫണ്ട് അനുവദിക്കുന്നതിൽ ഡെമോക്രാറ്റുകളും വൈറ്റ് ഹൗസും തമ്മിലുണ്ടായ അഭിപ്രായവ്യത്യാസമാണ് നിലവിലെ പ്രതിസന്ധിക്ക് കാരണമായത്.
ഗവൺമെന്റ് അടച്ചുപൂട്ടൽ തുടരുന്നിടത്തോളം കാലം ഗ്ലോബൽ എൻട്രി സേവനങ്ങൾ പുനഃസ്ഥാപിക്കില്ലെന്ന് യുഎസ് അധികൃതർ വ്യക്തമാക്കിയിട്ടുണ്ട്. അമേരിക്കൻ കസ്റ്റംസ് ആൻഡ് ബോർഡർ പ്രൊട്ടക്ഷൻ വിഭാഗമാണ് ഈ സേവനങ്ങൾ നിയന്ത്രിക്കുന്നത് എന്നതിനാൽ, നിലവിലെ മാറ്റങ്ങളെക്കുറിച്ച് കൂടുതൽ വിവരങ്ങൾ നൽകാൻ തങ്ങൾക്ക് സാധിക്കില്ലെന്ന് കാനഡ ബോർഡർ സർവീസസ് ഏജൻസി അറിയിച്ചു. മുൻകൂട്ടി സ്ക്രീനിങ് പൂർത്തിയാക്കിയ യാത്രക്കാർക്ക് വിമാനത്താവളങ്ങളിൽ വേഗത്തിലുള്ള യാത്രാ സൗകര്യം ഉറപ്പാക്കുന്ന സംവിധാനമാണ് ഇതോടെ തടസ്സപ്പെട്ടിരിക്കുന്നത്.
