വാഷിങ്ടൺ: വ്യാപാര കരാറുകളുമായി ബന്ധപ്പെട്ട ചർച്ചകൾക്കായി അമേരിക്കൻ, കനേഡിയൻ ഉദ്യോഗസ്ഥർ വരും ആഴ്ചകളിൽ കൂടിക്കാഴ്ച നടത്തുമെന്ന് യുഎസ് ട്രേഡ് റെപ്രസന്റേറ്റീവ് ജാമിസൺ ഗ്രീർ. ബുധനാഴ്ച ഇരുരാജ്യങ്ങളിലെയും ഉദ്യോഗസ്ഥർ തമ്മിൽ പ്രാഥമിക ചർച്ചകൾ നടത്തിയതായും വരാനിരിക്കുന്ന ഔദ്യോഗിക കൂടിക്കാഴ്ചകളിൽ പുതിയ വ്യാപാര കരാറുകൾക്കുള്ള നിർദ്ദേശങ്ങൾ ഉരുത്തിരിയുമെന്നും അദ്ദേഹം വ്യക്തമാക്കി.
പുതിയ വ്യാപാര കരാർ സംബന്ധിച്ച് കാനഡയുടെ ഭാഗത്തുനിന്ന് ചില നിർദ്ദേശങ്ങൾ മുന്നോട്ടുവെച്ചിട്ടുണ്ടെന്നും ട്രംപ് ഭരണകൂടം അവ പരിശോധിക്കാൻ തയ്യാറാണെന്നും ഗ്രീർ പറഞ്ഞു. ട്രംപ് ഭരണകൂടത്തിന് കീഴിൽ കാനഡയുമായുള്ള വ്യാപാര ബന്ധങ്ങളിൽ നിർണ്ണായകമായ മാറ്റങ്ങളാണ് നിലവിൽ പ്രതീക്ഷിക്കുന്നത്. ഇരുരാജ്യങ്ങളും തമ്മിലുള്ള സാമ്പത്തിക താൽപ്പര്യങ്ങൾ സംരക്ഷിച്ചുകൊണ്ട് എങ്ങനെ ഒരു ധാരണയിലെത്താം എന്നതിലാകും വരും ആഴ്ചകളിലെ ചർച്ചകൾ പ്രധാനമായും കേന്ദ്രീകരിക്കുക.
