ടൊറന്റോ: ‘പ്രോജക്റ്റ് സൗത്ത്’ അഴിമതിക്കേസിലെ പ്രതികളായ ആറ് പൊലീസ് ഉദ്യോഗസ്ഥർ ചൊവ്വാഴ്ച കോടതിയിൽ ഹാജരാകാതിരുന്നത് നിയമത്തിലെ പഴുതുകൾ ഉപയോഗിച്ചെന്ന്‌ റിപ്പോർട്ട്‌. യോർക്ക് റീജിയണൽ പൊലീസ് അറസ്റ്റ് ചെയ്ത ഈ ഉദ്യോഗസ്ഥർ തങ്ങൾക്ക് പകരം അഭിഭാഷകരെയാണ്‌ കോടതിയിലേക്ക് നിയോഗിച്ചത്‌. കാനഡയിലെ ക്രിമിനൽ കോഡ് അനുസരിച്ച്, ഒരു പ്രതിക്ക് കോടതിയിൽ നേരിട്ട് ഹാജരാകുന്നതിന് പകരം തന്റെ വക്കീലിനെ ചുമതലപ്പെടുത്താൻ അവകാശമുണ്ട്. പ്രാഥമിക വാദങ്ങൾ നടക്കുന്ന ഘട്ടത്തിൽ പ്രതി നേരിട്ട് ഹാജരാകേണ്ടതില്ല എന്ന നിയമമാണ് ഉദ്യോഗസ്ഥർ പ്രയോജനപ്പെടുത്തിയത്. കേസ് വിവാദമായ സാഹചര്യത്തിൽ മാധ്യമങ്ങളെയും പൊതുജനങ്ങളെയും ഒഴിവാക്കാനാണ് ഇവർ കോടതിയിൽ എത്താതിരുന്നതെന്ന് നിയമവിദഗ്ദ്ധർ ചൂണ്ടിക്കാട്ടുന്നു. ജോൺ മെയ്‌ഡ്‌ലി സീനിയർ (വിരമിച്ച ഉദ്യോഗസ്ഥൻ), കോൺസ്റ്റബിൾ ജോൺ മെയ്‌ഡ്‌ലി ജൂനിയർ, സെർജന്റ് റോബർട്ട് ബ്ലാക്ക്, സെർജന്റ് കാൾ ഗ്രെലെറ്റ്, സെർജന്റ് സൗരഭ്ജിത് ബേദി, കോൺസ്റ്റബിൾ ഏലിയാസ് മൗവാദ് എന്നീ ഉദ്യോഗസ്ഥരാണ്‌ കേസിലെ പ്രതികൾ.
നീതിനിർവ്വഹണം തടസ്സപ്പെടുത്താൻ ഗൂഢാലോചന നടത്തുക, മയക്കുമരുന്ന് കടത്ത് തുടങ്ങിയ ഗുരുതരമായ കുറ്റങ്ങളാണ് ഇവർക്കെതിരെ ചുമത്തിയത്‌. ഈ കേസിൽ പ്രതികളായ ഏഴ് ഉദ്യോഗസ്ഥരിൽ കോൺസ്റ്റബിൾ തിമോത്തി ബാൺഹാർട്ട് ഒഴികെ മറ്റെല്ലാവരെയും പൊലീസ് നേരത്തെ തന്നെ ജാമ്യത്തിൽ വിട്ടയച്ചിരുന്നു. സാധാരണ ക്രിമിനൽ കേസുകളിൽ പ്രതികൾക്ക് ലഭിക്കാത്ത ഇത്തരം ആനുകൂല്യങ്ങൾ പൊലീസ് ഉദ്യോഗസ്ഥർക്ക് ലഭിച്ചത് വിവേചനപരമാണെന്ന് ചില അഭിഭാഷകർ ആരോപിക്കുന്നു. ബാൺഹാർട്ടിനെതിരെ 17 ഓളം കുറ്റങ്ങളാണ് ചുമത്തിയിരിക്കുന്നത്. സാധാരണഗതിയിൽ വിചാരണ തുടങ്ങുന്ന ദിവസമോ അല്ലെങ്കിൽ വിധി പ്രസ്താവിക്കുന്ന ദിവസമോ മാത്രമേ ഈ ഉദ്യോഗസ്ഥർ കോടതിയിൽ നേരിട്ട് ഹാജരാകാൻ സാധ്യതയുള്ളൂ. വിചാരണ നടപടികൾ പൂർത്തിയാകാൻ മാസങ്ങളോ വർഷങ്ങളോ എടുത്തേക്കാം.
