ഓട്ടവ: അന്തരീക്ഷത്തിലെ കാർബൺ ഡൈ ഓക്സൈഡ് നേരിട്ട് നീക്കം ചെയ്യുന്ന പദ്ധതികൾക്കായി 10 കോടി ഡോളർ സമാഹരിക്കാൻ ലക്ഷ്യമിട്ട് കാനഡയിൽ പുതിയ സഖ്യത്തിന് തുടക്കം. ‘അഡ്വാൻസ് കാർബൺ റിമൂവൽ കോളിഷൻ’ എന്ന് പേരിട്ടിരിക്കുന്ന ഈ കൂട്ടായ്മയിൽ കനേഡിയൻ സർക്കാർ, ആർബിസി, ബിഎംഒ, ഷോപ്പിഫൈ തുടങ്ങിയ പ്രമുഖ സ്ഥാപനങ്ങൾ അംഗങ്ങളാണ്. 2030-ഓടെ ഈ തുക സമാഹരിക്കാനാണ് സഖ്യം ലക്ഷ്യമിടുന്നത്.
വ്യവസായ ശാലകളിൽ നിന്നുള്ള കാർബൺ പിടിച്ചെടുക്കുന്നതിന് പകരം, അന്തരീക്ഷത്തിൽ നിന്ന് നേരിട്ട് കാർബൺ ഡൈ ഓക്സൈഡ് വലിച്ചെടുത്ത് കല്ലുകളിൽ ലയിപ്പിക്കുന്ന സാങ്കേതികവിദ്യയാണ് ഇതിൽ പ്രധാനമായും ഉപയോഗിക്കുന്നത്. ഇത് സാമ്പത്തിക വളർച്ചയ്ക്കും കാലാവസ്ഥാ വ്യതിയാനത്തെ നേരിടാനും സഹായിക്കുമെന്ന് പരിസ്ഥിതി മന്ത്രി ജൂലി ഡാബ്രുസിൻ പറഞ്ഞു. നിലവിൽ മൈക്രോസോഫ്റ്റ് അടക്കമുള്ള വമ്പൻ കമ്പനികൾ കനേഡിയൻ സ്റ്റാർട്ടപ്പുകളിൽ നിന്ന് കാർബൺ ക്രെഡിറ്റുകൾ വാങ്ങാൻ കരാറുകളിൽ ഒപ്പിട്ടിട്ടുണ്ട്.
എന്നാൽ, ഈ പദ്ധതികൾ വൻതോതിൽ ഊർജ്ജം ചെലവാക്കുന്നതും ചെലവേറിയതുമാണെന്ന് വിമർശകർ ചൂണ്ടിക്കാട്ടുന്നു. ഫോസിൽ ഇന്ധനങ്ങളിൽ നിന്ന് പുനരുപയോഗ ഊർജ്ജത്തിലേക്കുള്ള ചുവടുമാറ്റത്തെ ഇത്തരം പദ്ധതികൾ മന്ദഗതിയിലാക്കുമെന്ന് കാലാവസ്ഥാ വിദഗ്ധ കാതറിൻ അബ്രു മുന്നറിയിപ്പ് നൽകി. നിലവിലെ മലിനീകരണം കുറയ്ക്കുന്നതിനാണ് മുൻഗണന നൽകേണ്ടതെന്നും പ്രകൃതിദത്ത പരിസ്ഥിതി വ്യവസ്ഥകളെ സംരക്ഷിക്കണമെന്നും അവർ കൂട്ടിച്ചേർത്തു.
