ഓട്ടവ: വിദേശത്ത് ജനിച്ച കനേഡിയൻ വംശജർക്ക് ആശ്വാസമായി പൗരത്വ നിയമത്തിൽ നിർണ്ണായക ഭേദഗതി വരുത്തി കാനഡ. ബിൽ സി-3 (Bill C-3) എന്ന പുതിയ നിയമം പ്രാബല്യത്തിൽ വന്നതോടെ, തലമുറകളായി വിദേശത്ത് കഴിയുന്ന കനേഡിയൻ വംശജർക്ക് പൗരത്വം ലഭിക്കാനുള്ള വഴിയാണ് തെളിഞ്ഞത്. മുമ്പ് വിദേശത്തു ജനിച്ച കനേഡിയൻ പൗരന്മാർക്ക് അവരുടെ കുട്ടികൾക്ക് പൗരത്വം കൈമാറാൻ കഴിയാത്ത സ്ഥിതിയായിരുന്നു. പുതിയ നിയമപ്രകാരം എത്ര തലമുറ പിന്നിലായാലും പാരമ്പര്യം കൃത്യമായി തെളിയിക്കുകയാണെങ്കിൽ പൗരത്വം ലഭിക്കും. 2025 ഡിസംബർ 15-ന് മുമ്പ് വിദേശത്തു ജനിച്ചവർക്കും ഈ ആനുകൂല്യം ലഭിക്കും. ഈ കാലാവധിക്കുള്ളിൽ വിദേശത്തു ജനിക്കുന്ന കുട്ടികൾക്ക് പൗരത്വം ലഭിക്കണമെങ്കിൽ, അവരുടെ കനേഡിയൻ മാതാപിതാക്കൾ കുട്ടി ജനിക്കുന്നതിന് മുമ്പ് കുറഞ്ഞത് 1,095 ദിവസങ്ങൾ (3 വർഷം) കാനഡയിൽ താമസിക്കണം. യു.എസിലെ നിലവിലെ രാഷ്ട്രീയ സാഹചര്യങ്ങൾ കണക്കിലെടുത്ത് ആയിരക്കണക്കിന് ആളുകൾ കനേഡിയൻ വേരുകൾ തേടിയുള്ള യാത്രയിലാണ്.
മാമോദീസ സർട്ടിഫിക്കറ്റുകൾ, ജനനരേഖകൾ, വിവാഹ സർട്ടിഫിക്കറ്റുകൾ എന്നിവ ഹാജരാക്കി പാരമ്പര്യം തെളിയിക്കാനാണ് ഇവർ ശ്രമിക്കുന്നത്. പൗരത്വത്തിന് അപേക്ഷിക്കുന്നവരുടെ എണ്ണം വർദ്ധിച്ചതോടെ കെബെക്ക് ഉൾപ്പെടെയുള്ള പ്രവിശ്യകളിലെ ആർക്കൈവ്സുകളിൽ തിരക്ക് വർദ്ധിച്ചിരിക്കുകയാണ്. 2025 ജനുവരിയിൽ വെറും 32 അപേക്ഷകൾ ലഭിച്ചിരുന്ന സ്ഥാനത്ത് 2026 ജനുവരി ആയപ്പോഴേക്കും ആയിരത്തിലധികം അപേക്ഷകളാണ് ലഭിക്കുന്നത്. അപേക്ഷകളുടെ എണ്ണം വർദ്ധിച്ചതിനാൽ പൗരത്വ സർട്ടിഫിക്കറ്റ് ലഭിക്കാൻ ഏകദേശം 11 മാസമെങ്കിലും കാലതാമസം നേരിടുമെന്ന് ഇമിഗ്രേഷൻ വിഭാഗം (IRCC) അറിയിച്ചു.
