ഓട്ടവ: കാനഡയിലെ ഫെഡറൽ സർക്കാർ സർവീസിൽ വൻതോതിൽ തസ്തികകൾ വെട്ടിക്കുറയ്ക്കാൻ തീരുമാനം. കാർണി സർക്കാരിന്റെ പുതിയ സാമ്പത്തിക നയത്തിന്റെ ഭാഗമായി അടുത്ത മൂന്ന് വർഷത്തിനുള്ളിൽ 12,000-ത്തിലധികം മുഴുവൻ സമയ തസ്തികകൾ ഇല്ലാതാക്കാനാണ് ലക്ഷ്യമിടുന്നത്. വിവിധ സർക്കാർ വകുപ്പുകളുടെ പ്രവർത്തനച്ചെലവ് കുറയ്ക്കുന്നതിന്റെ ഭാഗമായാണ് ഈ നടപടി. പബ്ലിക് സർവീസസ് ആൻഡ് പ്രൊക്യുർമെന്റ് കാനഡ: 1,793 തസ്തികകൾ, ഹെൽത്ത് കാനഡ: 942 തസ്തികകൾ, സ്റ്റാറ്റിസ്റ്റിക്സ് കാനഡ: 900 തസ്തികകൾ എന്നീ വകുപ്പുകളിലാണ് ഏറ്റവും കൂടുതൽ തസ്തികകൾ നഷ്ടപ്പെടുന്നത്. സാമ്പത്തിക അച്ചടക്കം പാലിക്കുന്നതിനായി ചില നിർണായക ദൗത്യങ്ങളും സേവനങ്ങളും അവസാനിപ്പിക്കാൻ വിവിധ വകുപ്പുകൾക്ക് നിർദ്ദേശം നൽകി.
കനേഡിയൻ സ്പേസ് ഏജൻസിയുടെ അഭിമാന പദ്ധതിയായ ‘LEAP Lunar Rover’ (ചാന്ദ്ര ദൗത്യം) പ്രവർത്തനം അവസാനിപ്പിക്കുന്നതിനും തീരുമാനമായി. കാലാവധി കഴിഞ്ഞ പഴയ യുദ്ധവിമാനങ്ങളും വാഹനങ്ങളും സൈന്യം ഒഴിവാക്കും. കൂടാതെ, ഉപയോഗശൂന്യമായി കിടക്കുന്ന സർക്കാർ ഭൂമിയും കെട്ടിടങ്ങളും വിറ്റഴിക്കാനും തീരുമാനമായി. കാനഡ റവന്യൂ ഏജൻസിയുടെ ചില പ്രത്യേക യൂണിറ്റുകളും നിറുത്തലാക്കും. ഫുഡ് ഇൻസ്പെക്ഷൻ ഏജൻസി തങ്ങളുടെ പരീക്ഷണശാലകളുടെ എണ്ണം കുറച്ച് പ്രധാനപ്പെട്ട പരിശോധനകളിൽ മാത്രമായി ഒതുങ്ങും.
ജീവനക്കാരുടെ എണ്ണം കുറയ്ക്കുമ്പോഴുണ്ടാകുന്ന പ്രത്യാഘാതം മറികടക്കാൻ ആർട്ടിഫിഷ്യൽ ഇന്റലിജൻസ് വ്യാപകമായി ഉപയോഗപ്പെടുത്താനാണ് സർക്കാർ നീക്കം. നീതിന്യായ വകുപ്പ്, പൊതുസുരക്ഷാ വിഭാഗം എന്നിവയുൾപ്പെടെയുള്ള പല വകുപ്പുകളും തങ്ങളുടെ സേവനങ്ങൾ വേഗത്തിലാക്കാൻ എഐ സാങ്കേതികവിദ്യ നടപ്പിലാക്കും. സർക്കാരിന്റെ ഈ നീക്കത്തിനെതിരെ ജീവനക്കാരുടെ സംഘടനകൾ രംഗത്തെത്തി. ഇത് പൊതുസേവന മേഖലയ്ക്ക് നേരെയുള്ള കടന്നുകയറ്റമാണെന്ന് പബ്ലിക് സർവീസ് അലയൻസ് ഓഫ് കാനഡ (PSAC) ആരോപിച്ചു. ആയിരക്കണക്കിന് ആളുകൾക്ക് ജോലി നഷ്ടപ്പെടുന്നത് സാധാരണക്കാർക്ക് ലഭിക്കേണ്ട സേവനങ്ങളെ സാരമായി ബാധിക്കുമെന്ന് യൂണിയൻ പ്രസിഡന്റ് ഷാരോൺ ഡിസൂസ പറഞ്ഞു. ഏതൊക്കെ പദ്ധതികളെയാണ് ഈ വെട്ടിക്കുറയ്ക്കൽ നേരിട്ട് ബാധിക്കുക എന്നതിനെക്കുറിച്ച് സർക്കാരിന് വ്യക്തമായ പദ്ധതിയില്ലെന്നാണ് പ്രതിപക്ഷ പാർട്ടികളുടെ വിമർശനം. വരും മാസങ്ങളിൽ പാർലമെന്റ് കമ്മിറ്റികൾക്ക് മുന്നിൽ ഈ വിഷയം വലിയ രാഷ്ട്രീയ പോരാട്ടത്തിന് വഴിവെച്ചേക്കും.
