മൺട്രിയോൾ: വ്യാപാര സംഘർഷങ്ങൾ നിലനിൽക്കുന്ന പശ്ചാത്തലത്തിൽ യുഎസ് പ്രസിഡന്റ് ഡോണാൾഡ് ട്രംപിന്റെ നയങ്ങളെ പരിഹസിച്ച് പ്രധാനമന്ത്രി മാർക്ക് കാർണി. മൺട്രിയോളിൽ നടന്ന ലിബറൽ പാർട്ടി കൺവെൻഷനിൽ സംസാരിക്കവെയാണ് അമേരിക്കൻ ഉൽപ്പന്നങ്ങൾ ബഹിഷ്കരിക്കുന്ന കനേഡിയൻമാരുടെ നിലപാടിനെ അദ്ദേഹം പിന്തുണച്ചത്.
യുഎസ് ഉൽപ്പന്നങ്ങൾ ഒഴിവാക്കി ആഭ്യന്തര ഉൽപ്പന്നങ്ങളെ പ്രോത്സാഹിപ്പിക്കുന്ന കനേഡിയൻമാരുടെ “ഐക്യദാർഢ്യ പ്രവൃത്തികളെ” കാർണി പ്രശംസിച്ചു. പ്രസംഗത്തിനിടെ, “ആരെങ്കിലും അടുത്തിടെ ബർബൺ കഴിച്ചിട്ടുണ്ടോ?” എന്ന് അദ്ദേഹം ചോദിച്ചപ്പോൾ സദസ്സിൽ നിന്ന് വലിയ ചിരി പടർന്നു. കനേഡിയൻ ജനത സ്വന്തം രാജ്യത്തെ ഉൽപ്പന്നങ്ങളെ വീണ്ടും കണ്ടെത്തുകയാണെന്നും അദ്ദേഹം കൂട്ടിച്ചേർത്തു.
സൈനിക ആവശ്യങ്ങൾക്കായി അമേരിക്കയെ അമിതമായി ആശ്രയിക്കുന്ന രീതി അവസാനിപ്പിക്കുമെന്ന് അദ്ദേഹം ആവർത്തിച്ചു. “കനേഡിയൻ സൈന്യം ചിലവാക്കുന്ന ഓരോ ഡോളറിലെയും 70 സെന്റ് അമേരിക്കയിലേക്ക് പോകുന്ന കാലം കഴിഞ്ഞു,” എന്ന് അദ്ദേഹം പ്രതിനിധികളോട് പറഞ്ഞു.
ട്രംപ് ഭരണകൂടം കനേഡിയൻ ഉൽപ്പന്നങ്ങൾക്ക് മേൽ ചുമത്തിയ ഉയർന്ന താരിഫുകളും, കാനഡയെ യുഎസിന്റെ “51-ാമത്തെ സംസ്ഥാനം” എന്ന് ട്രംപ് വിശേഷിപ്പിച്ചതും ഇരുരാജ്യങ്ങളും തമ്മിലുള്ള ബന്ധം വഷളാക്കിയിരുന്നു. ഇതിനെത്തുടർന്ന് കാനഡയിൽ അമേരിക്കൻ ഉൽപ്പന്നങ്ങൾക്ക് നേരെ വ്യാപകമായ ബഹിഷ്കരണം നടക്കുന്നുണ്ട്. അമേരിക്കൻ വിനോദസഞ്ചാര കേന്ദ്രങ്ങൾക്ക് പകരം ആഭ്യന്തര യാത്രകൾ തിരഞ്ഞെടുക്കുന്നതും യുഎസ് ലഹരിപാനീയങ്ങൾ ഒഴിവാക്കുന്നതും ഇതിന്റെ ഭാഗമാണ്.
വിദേശ വിപണികളെ, പ്രത്യേകിച്ച് അമേരിക്കയെ ആശ്രയിക്കുന്നത് കുറയ്ക്കാൻ Buy Canadian സംരംഭത്തിന് സർക്കാർ ഊന്നൽ നൽകുമെന്ന് കാർണി വ്യക്തമാക്കി. അടുത്ത പത്ത് വർഷത്തിനുള്ളിൽ യുഎസ് ഇതര രാജ്യങ്ങളിലേക്കുള്ള കയറ്റുമതി ഇരട്ടിയാക്കുകയാണ് കാനഡയുടെ ലക്ഷ്യം. താൽക്കാലികമായ സാമ്പത്തിക പ്രതിസന്ധികളേക്കാൾ, രാജ്യത്തിന്റെ ഐക്യവും പൊതുനന്മയും സംരക്ഷിക്കുന്നതിനാണ് മുൻഗണനയെന്നും അദ്ദേഹം പ്രസ്താവിച്ചു.
