ടൊറന്റോ: ശനിയാഴ്ച ടൊറന്റോയിലും ജിടിഎയിലും കനത്ത മഴ പെയ്യാൻ സാധ്യതയുണ്ടെന്ന് കാലാവസ്ഥാ വകുപ്പ്. അന്തരീക്ഷത്തിലുണ്ടായ ന്യൂനമർദ്ദമാണ് മഴയ്ക്ക് കാരണം. ടൊറന്റോ, മിസ്സിസാഗ, ബ്രാംപ്ടൺ, നയാഗ്ര, ഹാമിൽട്ടൺ തുടങ്ങിയ ഇടങ്ങളിലാണ് പ്രധാനമായും മഴ ലഭിക്കുക. പലയിടങ്ങളിലും 30 മുതൽ 50 മില്ലിമീറ്റർ വരെ മഴ പെയ്തേക്കാം. ശനിയാഴ്ച വൈകുന്നേരത്തോടെയും ഞായറാഴ്ച രാവിലെയോടെയും ചില സ്ഥലങ്ങളിൽ മഴ കുറഞ്ഞ് നേരിയ ചാറ്റൽമഴയായി മാറും.
ശനിയാഴ്ച രാവിലെ ആരംഭിക്കുന്ന മഴ ഉച്ചയ്ക്ക് ശേഷം ശക്തമാകാനാണ് സാധ്യത. രാത്രിയോടെ മഴയുടെ ശക്തി കുറയുമെങ്കിലും ഞായറാഴ്ചയും ഇടവിട്ട് മഴ പെയ്തേക്കാം. മഴയുള്ളതിനാൽ ശനിയാഴ്ച തണുപ്പ് കൂടിയ അന്തരീക്ഷമായിരിക്കും. എന്നാൽ ഞായറാഴ്ചയോടെ ചൂട് 21 ഡിഗ്രി സെൽഷ്യസ് വരെ ഉയർന്നേക്കാം. അടുത്ത ആഴ്ചയോടെ ചൂട് സാധാരണ നിലയേക്കാൾ കൂടുമെന്നും കാലാവസ്ഥാ നിരീക്ഷകർ പറയുന്നു.
