ബ്രാംപ്ടൺ: ബ്രാംപ്ടണിലെ ഒരു പ്രാഥമിക വിദ്യാലയത്തിന് സമീപം കഴിഞ്ഞ ഏപ്രിലിൽ നടന്ന ഇരട്ട വെടിവെപ്പ് കേസിൽ രണ്ട് കൗമാരക്കാരുൾപ്പെടെ അഞ്ച് പേർക്കെതിരെ പീൽ റീജിയണൽ പോലീസ് കുറ്റം ചുമത്തി.
ഏപ്രിൽ 3ന് രാത്രി 10:20ഓടെ റൂഥർഫോർഡ് റോഡിനും കെന്നഡി റോഡിനും സമീപമാണ് വെടിവെപ്പ് നടന്നത്. സംഭവത്തിൽ രണ്ട് പേർ കൊല്ലപ്പെട്ടിരുന്നു. കേസുമായി ബന്ധപ്പെട്ട് അന്വേഷണം ശക്തമാക്കിയ പോലീസ് ഒളിവിലായിരുന്ന പ്രതികളെ കണ്ടെത്തി അറസ്റ്റ് ചെയ്തതായി അറിയിച്ചു.
കേസിൽ 17 വയസ്സുള്ള രണ്ട് കൗമാരക്കാരും ഉൾപ്പെട്ടിട്ടുണ്ടെന്ന് പോലീസ് വ്യക്തമാക്കി. സംഭവത്തിന്റെ പശ്ചാത്തലം, പ്രതികളുടെ പങ്കാളിത്തം, വെടിവെപ്പിന് പിന്നിലെ കാരണങ്ങൾ എന്നിവ സംബന്ധിച്ച അന്വേഷണം തുടരുകയാണ്. അന്വേഷണത്തിന്റെ ഭാഗമായി കൂടുതൽ വിവരങ്ങൾ ലഭ്യമാകുന്നതിനനുസരിച്ച് പോലീസ് പുറത്തുവിടുമെന്നും അറിയിച്ചു.
