ഓട്ടവ: അമേരിക്കയുമായുള്ള വ്യാപാര തർക്കം വീണ്ടും രൂക്ഷമായതോടെ കാനഡയിൽ ‘ബൈ കനേഡിയൻ’(Buy Canadian) പ്രചാരണം ശക്തമാകുന്നു. പുതിയ 50 ശതമാനം യു.എസ്. താരിഫുകൾ പ്രാബല്യത്തിൽ വന്നതിന് പിന്നാലെ കനേഡിയൻ ഉൽപ്പന്നങ്ങൾ തിരഞ്ഞെടുക്കാൻ കൂടുതൽ ഉപഭോക്താക്കൾ രംഗത്തെത്തിയതായി റിപ്പോർട്ട്.
മാറിമറിയുന്ന വിപണി പ്രവണതകൾ:
ദേശീയ വികാരത്തോടെയാണ് കാനഡയിലെ ഉപഭോക്താക്കൾ ഈ നീക്കത്തെ ഏറ്റെടുത്തിരിക്കുന്നത്. സൂപ്പർമാർക്കറ്റുകളിലും ഓൺലൈൻ വിപണിയിലും കനേഡിയൻ നിർമ്മിത സാധനങ്ങൾക്ക് ഡിമാൻഡ് കുത്തനെ ഉയർന്നു. വിപണി വിദഗ്ധരുടെ നിരീക്ഷണമനുസരിച്ച് കാനഡക്കാർ ഇപ്പോൾ രണ്ട് പ്രധാന തത്വങ്ങളാണ് ഷോപ്പിംഗിൽ പിന്തുടരുന്നത്:
*ആദ്യം കനേഡിയൻ ഉൽപ്പന്നങ്ങൾ മാത്രം തിരഞ്ഞെടുക്കുക.
*കനേഡിയൻ ഉൽപ്പന്നങ്ങൾ ലഭ്യമല്ലെങ്കിൽ, അമേരിക്കൻ ഇതര ബ്രാൻഡുകൾ വാങ്ങുക.
ആപ്പുകളും സോഷ്യൽ മീഡിയയും സജീവം:
ഉൽപ്പന്നങ്ങൾ ഏത് രാജ്യത്തിന്റേതാണെന്ന് സ്കാൻ ചെയ്ത് കണ്ടെത്താൻ ‘മേപ്പിൾ സ്കാൻ’ (Maple Scan) പോലുള്ള മൊബൈൽ ആപ്പുകൾ കാനഡക്കാർ ഇപ്പോൾ വ്യാപകമായി ഉപയോഗിക്കുന്നുണ്ട്. കൂടാതെ ഫേസ്ബുക്ക് ഉൾപ്പെടെയുള്ള സോഷ്യൽ മീഡിയകളിലെ ‘മെയ്ഡ് ഇൻ കാനഡ’ (Made in Canada) കൂട്ടായ്മകളിൽ അംഗങ്ങളുടെ എണ്ണത്തിൽ 300 ശതമാനത്തോളം വർദ്ധനവാണ് രേഖപ്പെടുത്തിയത്. അമേരിക്കൻ ഉൽപ്പന്നങ്ങൾക്ക് പകരമുള്ള കനേഡിയൻ ബ്രാൻഡുകളുടെ വിവരങ്ങൾ പങ്കുവെക്കാൻ ഈ ഗ്രൂപ്പുകൾ ജനങ്ങളെ സഹായിക്കുന്നു.
വ്യാപാരികളുടെ പ്രത്യേക ക്രമീകരണങ്ങൾ:
ഉപഭോക്താക്കൾക്ക് ഉൽപ്പന്നങ്ങൾ എളുപ്പം തിരിച്ചറിയാൻ രാജ്യത്തെ പ്രമുഖ ഗ്രോസറി ശൃംഖലയായ ‘ലോബ്ലോസ്’ (Loblaw) അടക്കമുള്ള സൂപ്പർമാർക്കറ്റുകൾ പ്രത്യേക ലേബലിങ് സംവിധാനം ആരംഭിച്ചു കഴിഞ്ഞു. കനേഡിയൻ ഉൽപ്പന്നങ്ങൾക്ക് നേരെ രാജ്യത്തിന്റെ ദേശീയ ചിഹ്നമായ ‘മേപ്പിൾ ലീഫ്’ (Maple Leaf) മുദ്രയും, യു.എസ് താരീഫ് ബാധിച്ച ഉൽപ്പന്നങ്ങൾക്ക് നേരെ ‘T’ (Tariff) ചിഹ്നവും നൽകിയാണ് വ്യാപാരികൾ ഉപഭോക്താക്കളെ സഹായിക്കുന്നത്.
ഭരണനേതൃത്വത്തിന്റെ പിന്തുണ:
വില അല്പം കൂടിയാലും സ്വന്തം രാജ്യത്തിന്റെ സമ്പദ്വ്യവസ്ഥയെയും കർഷകരെയും സംരക്ഷിക്കാൻ കനേഡിയൻ ഉൽപ്പന്നങ്ങൾ തന്നെ വാങ്ങുമെന്ന ഉറച്ച തീരുമാനത്തിലാണ് ജനങ്ങൾ. ഇൻഡസ്ട്രി മിനിസ്റ്റർ മെലാനി ജോളി അടക്കമുള്ള പ്രമുഖ രാഷ്ട്രീയ നേതാക്കളും വിവിധ പ്രവിശ്യകളിലെ പ്രീമിയർമാരും തദ്ദേശീയ വിപണിയെ പിന്തുണയ്ക്കണമെന്ന് ജനങ്ങളോട് ഔദ്യോഗികമായി ആഹ്വാനം ചെയ്തിട്ടുണ്ട്. വരും ദിവസങ്ങളിൽ ഈ ഉപഭോക്തൃ മുന്നേറ്റം കാനഡയിലെ ആഭ്യന്തര വിപണിയിൽ വലിയ ചലനങ്ങൾ സൃഷ്ടിക്കുമെന്നാണ് വിലയിരുത്തപ്പെടുന്നത്.
കനേഡിയൻ ബ്രാൻഡുകൾക്ക് നേട്ടം:
അതേസമയം, ‘ബൈ കനേഡിയൻ’ തരംഗം ചില പ്രാദേശിക കമ്പനികൾക്ക് വലിയ നേട്ടമാകുന്നുണ്ട്. നോവ സ്കോഷ ആസ്ഥാനമായ Peace by Chocolate-ന്റെ വെബ്സൈറ്റ് ട്രാഫിക് കഴിഞ്ഞ ദിവസങ്ങളിൽ 500 ശതമാനം വർധിച്ചതായി കമ്പനി അറിയിച്ചു.
കാനഡയുടെ പതാകയും രാജ്യസ്നേഹവുമായി ബന്ധപ്പെട്ട സന്ദേശങ്ങളും പാക്കേജിങ്ങിൽ ഉൾപ്പെടുത്തിയിട്ടുള്ള കമ്പനിയുടെ ഉൽപ്പന്നങ്ങൾക്ക് ഉപഭോക്താക്കളിൽ നിന്ന് മികച്ച പ്രതികരണമാണ് ലഭിക്കുന്നത്.
വ്യാപാര യുദ്ധത്തെ തുടർന്ന് അമേരിക്കയിലേക്കുള്ള ഉൽപ്പന്ന കയറ്റുമതി കമ്പനി നിർത്തിവച്ചിട്ടുണ്ട്. താരിഫുമായി ബന്ധപ്പെട്ട അനിശ്ചിതത്വത്തിനൊപ്പം നിലവിലെ സാഹചര്യത്തിൽ അത് ശരിയായ തീരുമാനമാണെന്നും കമ്പനി വ്യക്തമാക്കി.
അമേരിക്കയുമായുള്ള വ്യാപാര സംഘർഷം തുടരുന്നതിനിടെ, ഉപഭോക്താക്കളുടെ വാങ്ങൽ തീരുമാനങ്ങൾ കനേഡിയൻ സമ്പദ്വ്യവസ്ഥയ്ക്ക് പിന്തുണ നൽകാനുള്ള ഒരു മാർഗമായി മാറുകയാണ്. എന്നാൽ വിലയും ലഭ്യതയും ഉപഭോക്താക്കളുടെ തീരുമാനങ്ങളിൽ നിർണായകമായി തുടരുമെന്നാണ് വിദഗ്ധരുടെ വിലയിരുത്തൽ.
