ആൽബെർട്ട സർക്കാരുമായി ബന്ധപ്പെട്ടതായി പറയപ്പെടുന്ന ഒരു രഹസ്യ രേഖ പുറത്തുവന്നതോടെ പ്രവിശ്യയിലെ പ്രകൃതിവാതക അടിസ്ഥാനസൗകര്യ വികസനം വീണ്ടും ചർച്ചയാകുന്നു. ആർട്ടിഫിഷ്യൽ ഇന്റലിജൻസ് ഡാറ്റാ സെന്ററുകളുടെയും എണ്ണ-വാതക മേഖലയുടെയും വർധിച്ചുവരുന്ന ഊർജാവശ്യകത നിറവേറ്റുന്നതിനായി പ്രകൃതിവാതക പൈപ്പ്ലൈൻ സംവിധാനത്തിൽ വലിയ മാറ്റങ്ങൾ പരിഗണിക്കുന്നതായി രേഖയിൽ പറയുന്നതായി റിപ്പോർട്ടുകൾ വ്യക്തമാക്കുന്നു.
പുതിയ പൈപ്പ്ലൈൻ പദ്ധതികൾക്ക് കൂടുതൽ അധികാരം നൽകുന്നതിനായി നിയമങ്ങളിൽ മാറ്റം വരുത്തുക, സർക്കാർ ഉടമസ്ഥതയിലുള്ള പുതിയ സ്ഥാപനങ്ങൾ രൂപീകരിക്കുക, സ്വകാര്യ കമ്പനികൾ നിക്ഷേപിക്കാൻ തയ്യാറാകാത്ത സാഹചര്യത്തിൽ സർക്കാർ ഇടപെടുക തുടങ്ങിയ ആശയങ്ങൾ രേഖയിൽ ഉൾപ്പെട്ടതായി റിപ്പോർട്ടുണ്ട്. ഒരു പുതിയ പൈപ്പ്ലൈൻ വഴി ഏകദേശം ആറ് ഗിഗാവാട്ട് ഡാറ്റാ സെന്റർ വൈദ്യുതി ഉൽപ്പാദനത്തിന് ആവശ്യമായ പ്രകൃതിവാതകം എത്തിക്കുന്ന പദ്ധതിക്ക് ഏകദേശം ആറ് ബില്യൺ ഡോളർ വരെ ചെലവ് വരാമെന്ന കണക്കും റിപ്പോർട്ട് ചെയ്തിട്ടുണ്ട്.
എന്നാൽ, രേഖയിലെ നിർദേശങ്ങൾക്കെതിരെ അൽബെർട്ട പ്രതിപക്ഷം വിമർശനം ഉയർത്തിയിട്ടുണ്ട്. ഉപഭോക്താക്കളുടെ ഊർജച്ചെലവ് ഉയരാൻ സാധ്യതയുണ്ടെന്നാണ് പ്രതിപക്ഷത്തിന്റെ ആരോപണം. അതേസമയം, പ്രീമിയർ ഡാനിയേൽ സ്മിത്ത് പുതിയ ക്രൗൺ കോർപ്പറേഷൻ രൂപീകരിക്കുന്നതിനുള്ള സാധ്യത ഇപ്പോൾ കുറവാണെന്നും പ്രകൃതിവാതക അടിസ്ഥാനസൗകര്യ പ്രശ്നങ്ങൾക്ക് പരിഹാരം കണ്ടെത്താൻ വ്യവസായവുമായി ചർച്ചകൾ തുടരുകയാണെന്നും വ്യക്തമാക്കി. രേഖയിലെ നിർദേശങ്ങൾ അന്തിമ സർക്കാർ നയമായി മാറിയിട്ടില്ലെന്നതും ശ്രദ്ധേയമാണ്.
