ബ്രിട്ടിഷ് കൊളംബിയ: വന്കൂവര് ഐലന്ഡില് (Vancouver Island) പടര്ന്നുപിടിച്ച കാട്ടുതീ നിയന്ത്രണാതീതമായി പടരുന്നു. വരണ്ട കാലാവസ്ഥയും കുത്തനെയുള്ള ഭൂപ്രകൃതിയും തീ അണയ്ക്കാനുള്ള അഗ്നിശമന സേനാംഗങ്ങളുടെ ശ്രമങ്ങള്ക്ക് കടുത്ത വെല്ലുവിളി ഉയര്ത്തുന്നുണ്ട്.
സൂക്കിന് (Sooke) വടക്കുള്ള മൗണ്ട് ജാക്കില് (Mount Jack) സെപ്റ്റംബര് 20-നാണ് തീപിടുത്തം കണ്ടെത്തിയത്. ഇതിനകം 276 ഹെക്ടര് പ്രദേശത്തേക്ക് തീ പടര്ന്നുപിടിച്ചിട്ടുണ്ട്. തീയില് നിന്നുള്ള കനത്ത പുക ബ്രിട്ടിഷ് കൊളംബിയയുടെ തലസ്ഥാന മേഖലയെ മൂടിയതിനെ തുടര്ന്ന് കാഴ്ചപരിധി കുറഞ്ഞത് വ്യോമമാര്ഗ്ഗമുള്ള രക്ഷാപ്രവര്ത്തനങ്ങളെ ബാധിച്ചു.
കനത്ത പുക മൂലം ഹെലികോപ്റ്ററുകളില് നിന്ന് വെള്ളമൊഴിക്കാന് കഴിയാതിരുന്ന ഭാഗങ്ങളില് ബുധനാഴ്ച തീ കൂടുതല് പടരുകയായിരുന്നുവെന്ന് ബി.സി. വൈല്ഡ്ഫയര് സര്വീസ് (B.C. Wildfire Service) അറിയിച്ചു. വീശിയടിക്കുന്ന കാറ്റ് തീ കിഴക്ക് ദിശയിലേക്ക് മാറ്റാന് കാരണമായിട്ടുണ്ട്. എങ്കിലും തണുത്ത അന്തരീക്ഷവും മഴയ്ക്കുള്ള സാധ്യതയും രക്ഷാപ്രവര്ത്തനത്തിന് അനുകൂലമാകുമെന്നാണ് പ്രതീക്ഷിക്കുന്നത്.
നിലവില് അറുപതോളം ഉദ്യോഗസ്ഥരെയാണ് കാട്ടുതീ നിയന്ത്രണവിധേയമാക്കാന് ചുമതലപ്പെടുത്തിയിരിക്കുന്നത്. ആവശ്യത്തിന് യന്ത്രസാമഗ്രികളും ഗ്രൗണ്ട് ക്രൂവും വ്യോമസേനയും രംഗത്തുണ്ടെന്ന് അധികൃതര് വ്യക്തമാക്കി.
മനുഷ്യരുടെ ഇടപെടലുകള് കാരണമാണ് തീപിടുത്തമുണ്ടായതെന്നാണ് പ്രാഥമിക നിഗമനം. എന്നാല് നിലവില് ജനവാസ മേഖലകള്ക്കോ മറ്റ് പ്രധാന അടിസ്ഥാന സൗകര്യങ്ങള്ക്കോ ഭീഷണിയില്ലെന്ന് അധികൃതര് അറിയിച്ചു. മുന്കരുതല് നടപടിയുടെ ഭാഗമായി മേഖലയിലെ പ്രധാന വിനോദസഞ്ചാര പാതയായ ഗാലപ്പിങ് ഗൂസ് റീജണല് ട്രെയില് (Galloping Goose Regional Trail), കപൂര് റീജണല് പാര്ക്ക് എന്നിവ താത്കാലികമായി അടച്ചു. പൊതുജനങ്ങള് സുരക്ഷ മുന്നിര്ത്തി ഈ പ്രദേശങ്ങളിലേക്ക് പ്രവേശിക്കരുതെന്ന് നിര്ദ്ദേശമുണ്ട്.
