കാല്‍ഗറി: ആല്‍ബര്‍ട്ടയില്‍ റഫറണ്ടം അടുത്തിരിക്കെ, കാനഡയില്‍ നിന്ന് വേര്‍പിരിയണമെന്ന ആവശ്യത്തില്‍ മാറ്റമില്ലാതെ വിഘടനവാദി നേതാക്കള്‍. ബി.സി തീരത്തേക്ക് പുതിയ എണ്ണ പൈപ്പ്ലൈന് വേഗത്തിലാക്കാനുള്ള ഫെഡറല്‍ സര്‍ക്കാരിന്റെ തീരുമാനം സ്വാഗതാര്‍ഹമാണെങ്കിലും രാജ്യത്തിനൊപ്പം തുടരില്ലെന്നാണ് ഇവരുടെ നിലപാട്.
ആല്‍ബര്‍ട്ട കാനഡയ്‌ക്കൊപ്പം നിലനില്‍ക്കണമോ അതോ വേര്‍പിരിയുന്നതിനായി രണ്ടാമതൊരു നിര്‍ബന്ധിത റഫറണ്ടം നടത്തണമോ എന്ന വിഷയത്തിലാണ് ഒക്ടോബര്‍ 19-ന് വോട്ടെടുപ്പ് നടക്കുന്നത്. വേര്‍പിരിയല്‍ തര്‍ക്കത്തിന് ഒരു അന്തിമ തീരുമാനം ആവശ്യമാണെന്ന് ചൂണ്ടിക്കാട്ടിയാണ് പ്രീമിയര്‍ ഡാനിയേല്‍ സ്മിത്ത് റഫറണ്ടം പ്രഖ്യാപിച്ചത്. കാനഡയില്‍ തന്നെ തുടരുന്നതിനാണ് താന്‍ വോട്ട് ചെയ്യുകയെന്ന് പറഞ്ഞ സ്മിത്ത്, ഫെഡറല്‍-സംസ്ഥാന സര്‍ക്കാരുകള്‍ കൈകോര്‍ക്കുന്നതാണ് രാജ്യത്തിന്റെ പുരോഗതിക്ക് നല്ലതെന്നതിന് ഉദാഹരണമായി ഈ പൈപ്പ്ലൈന് പദ്ധതിയെ ഉയര്‍ത്തിക്കാട്ടുകയും ചെയ്തു.
ഫോര്‍ട്ട് മക്മറെയില്‍ വെച്ച് പ്രധാനമന്ത്രി മാര്‍ക്ക് കാര്‍ണിയുമായി ചേര്‍ന്നാണ് ഡാനിയേല്‍ സ്മിത്ത് ബി.സി (ബ്രിട്ടീഷ് കൊളംബിയ) തീരത്തേക്ക് ആല്‍ബര്‍ട്ട എണ്ണ എത്തിക്കുന്നതിനുള്ള ‘പസിഫിക് ലിങ്ക്’ (Pacific Link) പൈപ്പ്ലൈന് പദ്ധതിയുടെ പുതിയ പുരോഗതി പ്രഖ്യാപിച്ചത്. പദ്ധതിയെ പൊതുതാല്‍പ്പര്യമുള്ള വന്‍കിട പദ്ധതിയായി പ്രഖ്യാപിച്ചതോടെ, ആവശ്യമായ അനുമതികളും ചര്‍ച്ചകളും വേഗത്തിലാക്കി ഒരു വര്‍ഷത്തിനകം നിര്‍മ്മാണം ആരംഭിക്കാന്‍ സാധിക്കും.
എന്നാല്‍, ഈ പ്രഖ്യാപനം കൊണ്ട് വ്യവസ്ഥിതിയില്‍ യാതൊരു മാറ്റവും ഉണ്ടാകുന്നില്ലെന്ന് ‘പാത്ത്വേ ടു ഇന്‍ഡിപെന്‍ഡന്‍സ്’ വിഘടനവാദി സംഘാടകനായ കോറി മോര്‍ഗന്‍ പറഞ്ഞു. വേര്‍പിരിയല്‍ വിഷയം വെറുമൊരു പൈപ്പ്ലൈനേക്കാള്‍ വളരെ ആഴത്തിലുള്ളതാണെന്ന് അദ്ദേഹം വ്യക്തമാക്കി.
അതേസമയം, പൈപ്പ്ലൈന് പ്രഖ്യാപനം ആല്‍ബര്‍ട്ട കാനഡ വിട്ടുപോകണമെന്ന വാദത്തെ ശക്തിപ്പെടുത്തുകയാണ് ചെയ്യുന്നതെന്ന് ‘ലെറ്റ് ആല്‍ബര്‍ട്ട ഡിസൈഡ്’ സഹനേതാവ് കീത്ത് വില്‍സണ്‍ അഭിപ്രായപ്പെട്ടു. സ്വന്തം വിഭവങ്ങള്‍ വിപണിയിലെത്തിക്കാന്‍ ആല്‍ബര്‍ട്ടയ്ക്ക് ഒട്ടേറെ സമയവും രാഷ്ട്രീയ വിഭവങ്ങളും നഷ്ടപ്പെടുത്തേണ്ടി വരുന്നു എന്നതിന്റെ തെളിവാണ് ഇതെന്നും, സ്വന്തമായി തീരുമാനമെടുക്കാന്‍ അധികാരമില്ലാതെ ഫെഡറല്‍ സര്‍ക്കാരിന്റെ ദയയ്ക്കായി കാത്തിരിക്കേണ്ടി വരുന്നുവെന്നും അദ്ദേഹം വിമര്‍ശിച്ചു.
കാനഡ വിട്ടുപോവുകയും പുതിയ പൈപ്പ്ലൈന് വഴി ലഭിക്കുന്ന ശതകോടിക്കണക്കിന് ഡോളറിന്റെ റവന്യൂ ആല്‍ബര്‍ട്ടയില്‍ തന്നെ നിലനിര്‍ത്തുകയും വേണമെന്ന് ‘സ്റ്റേ ഫ്രീ ആല്‍ബര്‍ട്ട’ അഭിഭാഷകനായ ജെഫ്രി റാത്ത് അഭിപ്രായപ്പെട്ടു. ഓട്ടവയ്‌ക്കോ ഒട്ടാവയെ പിന്തുണയ്ക്കുന്ന കെബെക് പോലുള്ള മറ്റ് പ്രവിശ്യകള്‍ക്കോ ഈ തുക വീതിച്ചു നല്‍കേണ്ടതില്ലെന്നും അദ്ദേഹം പറഞ്ഞു.
എന്നാല്‍, ഫെഡറല്‍-സംസ്ഥാന സര്‍ക്കാരുകള്‍ ഒരുമിച്ച് പ്രവര്‍ത്തിക്കുമ്പോഴാണ് വലിയ കാര്യങ്ങള്‍ സംഭവിക്കുന്നതെന്നും ഒക്ടോബര്‍ 19-ന് താന്‍ കാനഡയ്‌ക്കൊപ്പം നിലനില്‍ക്കാന്‍ വോട്ട് ചെയ്യുമെന്നും റീജിയണല്‍ മുന്‍സിപ്പാലിറ്റി ഓഫ് വുഡ് ബഫല്ലോ മേയര്‍ സാന്റി ബോമാന്‍ വ്യക്തമാക്കി. ഫോര്‍ട്ട് മക്മറെയും ആല്‍ബര്‍ട്ടയും നന്നായി പ്രവര്‍ത്തിക്കുമ്പോള്‍ കാനഡ മൊത്തത്തില്‍ പുരോഗമിക്കുമെന്നും അദ്ദേഹം കൂട്ടിച്ചേര്‍ത്തു.
