പീറ്റർബറോയിൽ ഇസ്രായേലുമായി ബന്ധമുള്ളത ഒരു കമ്പനിയുടെ കെട്ടിടത്തിന് നേരെ ആക്രമണം നടന്നു. കെട്ടിടത്തിന്റെ ജനലുകളിൽ ചുവന്ന പെയിന്റ് അടിച്ചതായും വൈദ്യുതി ലൈനുകളും വയറുകളും മുറിച്ച നിലയിൽ കണ്ടെത്തിയതായും വിവരമുണ്ട്. സംഭവത്തെ തുടർന്ന് പോലീസ് അന്വേഷണം ആരംഭിച്ചു.
ജിയോസ്പെക്ട്രം ടെക്നോളജീസിന്റെ ഉടമസ്ഥതയിലുള്ള കെട്ടിടമാണ് സംഭവവുമായി ബന്ധപ്പെട്ടിരിക്കുന്നത്. കമ്പനിക്ക് ഇസ്രായേലുമായി ബന്ധമുണ്ടെന്ന ആരോപണവും സംഭവത്തിന്റെ പശ്ചാത്തലത്തിൽ ഉയർന്നിട്ടുണ്ട്. ‘പലസ്തീൻ ആക്ഷൻ കാനഡ’ എന്ന സംഘടന ആക്രമണത്തിന്റെ ഉത്തരവാദിത്തം ഏറ്റെടുത്തതായി അറിയിച്ചിട്ടുണ്ട്. എന്നാൽ, സംഭവത്തിൽ ആരാണ് നേരിട്ട് പങ്കെടുത്തതെന്നും ആക്രമണത്തിന് പിന്നിലെ സാഹചര്യങ്ങൾ എന്താണെന്നും പോലീസ് അന്വേഷണത്തിലൂടെ സ്ഥിരീകരിക്കേണ്ടതുണ്ട്.
സംഭവത്തെ വിദ്വേഷപ്രേരിത കുറ്റകൃത്യമായി പരിഗണിച്ചാണ് അന്വേഷണം നടക്കുന്നത്.
രാഷ്ട്രീയ നിലപാടുകളോടുള്ള പ്രതിഷേധം സമാധാനപരമായി പ്രകടിപ്പിക്കാനുള്ള അവകാശം നിലനിൽക്കുന്നുണ്ടെങ്കിലും, സ്വത്ത് നശിപ്പിക്കുന്നതും വൈദ്യുതി ബന്ധങ്ങൾ വിച്ഛേദിക്കുന്നതും പൊതുസുരക്ഷയെ ബാധിക്കാവുന്ന പ്രവൃത്തികളാണ്. സംഭവവുമായി ബന്ധപ്പെട്ട തെളിവുകൾ ശേഖരിച്ച് ഉത്തരവാദികളായവരെ കണ്ടെത്താനാണ് അന്വേഷണ ഉദ്യോഗസ്ഥരുടെ ശ്രമം.
