കാൽഗറി : കാട്ടുതീ പുക വായു മോശമാകുകയും ദൃശ്യപരത കുറയുകയും ചെയ്തതോടെ ഇന്ന് രാവിലെ കാൽഗറിയിൽ പ്രത്യേക വായു ഗുണനിലവാര പ്രസ്താവന പുറപ്പെടുവിച്ചു. രാവിലെ എട്ടു മണിയോടെ കാൽഗറിയിലെ വായു ഗുണനിലവാര സൂചിക ഉയർന്ന അപകടസാധ്യതയുള്ള ഏഴ് ആയതായി എൻവയൺമെന്റ് കാനഡ അറിയിച്ചു.
എക്സ്പോ ലാറ്റിനോ, ഫോർട്ട് കാൽഗറിയിലെ കൺട്രി തണ്ടർ, ഷാ ചാരിറ്റി ക്ലാസിക്ക് എന്നിവ ഉൾപ്പെടെ നിരവധി പ്രധാന ഔട്ട്ഡോർ ഇവന്റുകൾ കാൽഗറി ഏരിയയിൽ നടക്കാനിരിക്കെയാണ് പ്രത്യേക വായു ഗുണനിലവാര മുന്നറിയിപ്പ് നൽകിയിരിക്കുന്നത്.
ഒകനാഗൻ, ഷുസ്വപ് തടാക പ്രദേശങ്ങൾ ഉൾപ്പെടെ ബ്രിട്ടിഷ് കൊളംബിയയിൽ ഡസൻ കണക്കിന് കാട്ടുതീ നിയന്ത്രണാതീതമായി പടർന്നതോടെയാണ് പ്രവിശ്യയിൽ കാട്ടുതീ പുക വ്യാപിച്ചത്.
എന്നാൽ, ആയിരക്കണക്കിന് ആളുകൾ പങ്കെടുക്കുന്ന മാരത്തൺ നടക്കുന്ന എഡ്മിന്റനിൽ വായു ഗുണനിലവാര സൂചിക അപകടസാധ്യത കുറഞ്ഞതാണെന്നും കാലാവസ്ഥാ ഏജൻസി അറിയിച്ചു.
