ടൊറന്റോ: സൈബർ ആക്രമണം നേരിട്ട് ടൊറന്റോ മൃഗശാല. ജനുവരി 5 നാണ് സംഭവം ആദ്യമായി റിപ്പോർട്ട് ചെയ്തത്. സംഭവത്തിനെതിരെ ഉദ്യോഗസ്ഥർ അടിയന്തര നടപടികൾ സ്വീകരിച്ചതായി മൃഗശാല അറിയിച്ചു. മൃഗശാലയിലെ അംഗങ്ങൾക്ക് ഇതുമൂലം എന്തെങ്കിലും ബുദ്ധിമുട്ടുണ്ടോയെന്ന് അന്വേഷിക്കുമെന്നും, കൂടുതൽ വിവരങ്ങൾക്കായി അന്വേഷണം നടത്തുമെന്നും ടൊറന്റോ മൃഗശാല അറിയിച്ചു.
മൃഗങ്ങളുടെ ക്ഷേമം, പരിചരണം, പിന്തുണാ സംവിധാനങ്ങൾ എന്നിവയെയും, മൃഗശാലയുടെ പ്രവർത്തനത്തെയും ഇത് ബാധിച്ചിട്ടില്ല. സൈബർ ആക്രമണം മൃഗശാലയുടെ വെബ്സൈറ്റിനെ ബാധിച്ചിട്ടില്ല, ആളുകൾക്ക് ടിക്കറ്റുകൾ ഓൺലൈനിൽ തന്നെ വാങ്ങാം. ആളുകളുടെ ക്രഡിറ്റ് കാർഡ് വിവരങ്ങളൊന്നും മൃഗശാല സൂക്ഷിക്കാറില്ല.
സംഭവം ടൊറന്റോ പൊലീസിൽ റിപ്പോർട്ട് ചെയ്തിട്ടുണ്ടെന്നും സ്ഥിതിഗതികൾ പരിഹരിക്കാൻ നഗരത്തിലെ ചീഫ് ഇൻഫർമേഷൻ സെക്യൂരിറ്റി ഓഫീസുമായും മൂന്നാം കക്ഷി സൈബർ സുരക്ഷാ വിദഗ്ധരുമായും ചേർന്ന് പ്രവർത്തിക്കുകയാണെന്നും മൃഗശാല അറിയിച്ചു .
