റിയാദ്: സൗദി അറേബ്യയിലെ പൊതുഗതാഗത അതോറിറ്റി, സ്വകാര്യ ടാക്സി മേഖലയിൽ ഹൈഡ്രജൻ ഉപയോഗിച്ച് പ്രവർത്തിക്കുന്ന വാഹനങ്ങൾ പരീക്ഷിക്കുന്നതിനുള്ള പൈലറ്റ് പ്രോഗ്രാം ആരംഭിച്ചു. രാജ്യത്തെ ഗതാഗത മേഖലയിൽ സുസ്ഥിരത കൈവരിക്കുന്നതിനുള്ള വലിയ നാഴികക്കല്ലായിരിക്കും ഈ പുതിയ സംരംഭം എന്നാണ് കണക്കാക്കുന്നത്. ഹൈഡ്രജൻ കാറുകൾ പൂജ്യം എമിഷൻ നിരക്കോടെ പ്രവർത്തിക്കുന്നതിനാൽ പരിസ്ഥിതി സൗഹൃദമാണ്. ഇവ ശബ്ദരഹിതവും കൂടുതൽ പ്രകടനക്ഷമവുമാണ്. പ്രതിദിനം 8 മണിക്കൂർ വരെ തുടർച്ചയായി പ്രവർത്തിക്കാനും 350 കിലോമീറ്റർ വരെ വേഗത്തിൽ സഞ്ചരിക്കാനും ഇവയ്ക്ക് കഴിയും.
പരമ്പരാഗത ഇന്ധനങ്ങളെ ആശ്രയിക്കുന്നത് കുറച്ച് കാർബൺ ബഹിർഗമനം കുറയ്ക്കുകയും രാജ്യത്തെ ജീവിത നിലവാരം മെച്ചപ്പെടുത്തുകയുമാണ് പദ്ധതിയിലൂടെ ലക്ഷ്യം വെയ്ക്കുന്നത്. പൊതുഗതാഗത അതോറിറ്റി ഇതിനകം ഇലക്ട്രിക് ബസുകളും സ്വയം ഓടിക്കുന്ന ബസുകളും പോലുള്ള ആധുനിക ഗതാഗത സംവിധാനങ്ങൾ നടപ്പിലാക്കിയിട്ടുണ്ട്. സൗദി അറേബ്യ സുസ്ഥിര ഊർജ്ജ സ്രോതസ്സുകളിലേക്ക് മാറുന്നതിനുള്ള ശ്രമങ്ങളുടെ ഭാഗമായാണ് പുതിയ പദ്ധതി അവതരിപ്പിച്ചിരിക്കുന്നത്.
