ടൊറൻ്റോ : കാനഡയിൽ ശീതകാലം പൂർത്തിയായിട്ടില്ലെങ്കിലും ചൂട് കൂടുന്നതിനനുസരിച്ച് കാലാവസ്ഥ ശാന്തമാകാൻ തുടങ്ങുന്നു. എന്നാൽ, ഈ ആഴ്ച കൊളറാഡോ ന്യൂനമർദ്ദത്തെ തുടർന്ന് ഒൻ്റാരിയോയുടെ ചില ഭാഗങ്ങളിൽ കനത്ത മഞ്ഞുവീഴ്ചയ്ക്കും മഴയ്ക്കും സാധ്യത ഉണ്ടെന്ന് കാലാവസ്ഥാ വകുപ്പ് പ്രവചിക്കുന്നു. മിസ്സിസാഗ, ബ്രാംപ്ടൺ, ഹാൾട്ടൺ, ദുർഹം, ഹാമിൽട്ടൺ, നയാഗ്ര, ജിടിഎ എന്നിവയുൾപ്പെടെ തെക്കൻ ഒൻ്റാരിയോയുടെ ചില ഭാഗങ്ങളിൽ കനത്ത മഴ ലഭിക്കുമെന്ന് പ്രതീക്ഷിക്കുന്നു. നീണ്ടുനിൽക്കുന്ന മഴയും മഞ്ഞുവീഴ്ചയും വെള്ളപ്പൊക്കത്തിന് കാരണമായേക്കും. താഴ്ന്ന പ്രദേശങ്ങളിലും ഡ്രെയിനേജ് സംവിധാനം ഇല്ലാത്ത സ്ഥലങ്ങളിലും വെള്ളപ്പൊക്ക ഭീഷണിയിലാണ്.
സഡ്ബറി, നോർത്ത് ബേ, വടക്കുകിഴക്കൻ ഒൻ്റാരിയോ എന്നിവിടങ്ങളിൽ മഴയും കനത്ത മഞ്ഞുവീഴ്ചയും ഉണ്ടാകുമെന്നും കാലാവസ്ഥാ ഏജൻസി പ്രവചിക്കുന്നു. അതേസമയം തണ്ടർ ബേ, ജെറാൾട്ടൺ, കപുസ്കാസിങ് എന്നിവയുൾപ്പെടെ വടക്കുപടിഞ്ഞാറൻ ഒൻ്റാരിയോയിൽ മഞ്ഞുവീഴ്ചയുടെ അളവ് വ്യത്യാസപ്പെട്ടേക്കാം. കൃത്യമായ മഴയുടെയും മഞ്ഞുവീഴ്ചയുടെയും അളവ് സംബന്ധിച്ച് അനിശ്ചിതത്വം നിലനിൽക്കുന്നു. പക്ഷേ ജിടിഎയുടെ വടക്ക്, മധ്യ, വടക്കുകിഴക്കൻ ഒൻ്റാരിയോ എന്നിവിടങ്ങളിൽ ഡ്രൈവർമാർ കുറഞ്ഞ ദൃശ്യപരത, മഞ്ഞുമൂടിയ റോഡുകൾ, കാലതാമസം എന്നിവയ്ക്കായി തയ്യാറെടുക്കണം. കൂടാതെ വെള്ളപ്പൊക്ക സാധ്യതയുള്ള പ്രദേശങ്ങളിലുള്ളവർ ജലനിരപ്പ് ഉയരുന്നതിൽ ജാഗ്രത പാലിക്കണം.
