ന്യൂജഴ്സി : എല്ലാ നാറ്റോ രാജ്യങ്ങളും റഷ്യയിൽ നിന്ന് എണ്ണ വാങ്ങുന്നത് അവസാനിപ്പിക്കണമെന്ന് യുഎസ് പ്രസിഡൻ്റ് ഡോണൾഡ് ട്രംപ് ആവശ്യപ്പെട്ടു. റഷ്യ-യുക്രെയ്ൻ യുദ്ധം അവസാനിപ്പിക്കുന്നതിന് ചൈന റഷ്യൻ പെട്രോളിയത്തിന് 50 മുതൽ 100% വരെ തീരുവ ചുമത്തണമെന്നും അദ്ദേഹം നിർദ്ദേശിച്ചു. നാറ്റോ സഖ്യത്തിലെ ചില അംഗങ്ങൾ റഷ്യൻ എണ്ണ വാങ്ങുന്നത് ഞെട്ടിപ്പിക്കുന്ന വിവരമാണെന്നും ട്രംപ് തന്‍റെ സോഷ്യൽ മീഡിയ സൈറ്റിൽ പോസ്റ്റ് ചെയ്തു. ചൈനയ്ക്കും ഇന്ത്യയ്ക്കും പുറമെ റഷ്യൻ എണ്ണ വാങ്ങുന്ന മൂന്നാമത്തെ വലിയ രാജ്യമാണ് നാറ്റോ അംഗമായ തുർക്കി. റഷ്യൻ എണ്ണ വാങ്ങുന്നതിൽ ഉൾപ്പെട്ടിരിക്കുന്ന 32 നാറ്റോ രാജ്യങ്ങളിൽ ഹംഗറിയും സ്ലൊവാക്യയും ഉൾപ്പെടുന്നു.
റഷ്യൻ എണ്ണയ്ക്കുള്ള നാറ്റോ നിരോധനവും ചൈനയ്ക്ക് മേലുള്ള തീരുവയും റഷ്യ-യുക്രെയ്ൻ യുദ്ധം അവസാനിപ്പിക്കുന്നതിന് സഹായകമാകുമെന്നും ട്രംപ് തന്‍റെ പോസ്റ്റിൽ പറഞ്ഞു. റഷ്യയുടെ മേൽ ചൈനയ്ക്ക് ശക്തമായ നിയന്ത്രണമുണ്ട്, ശക്തമായ താരിഫുകൾ ആ നിയന്ത്രണം തകർക്കും, അദ്ദേഹം വ്യക്തമാക്കി. റഷ്യൻ ഊർജ്ജ ഉൽപ്പന്നങ്ങൾ വാങ്ങുന്നതിനായി ഇന്ത്യയിൽ നിന്നുള്ള സാധനങ്ങൾക്ക് യുഎസ് പ്രസിഡന്റ് ഇതിനകം 25 ശതമാനം ഇറക്കുമതി നികുതി ഏർപ്പെടുത്തിയിട്ടുണ്ട്.
