കാൽഗറി : മുനിസിപ്പൽ തിരഞ്ഞെടുപ്പിൽ മേയർ സ്ഥാനത്തേക്ക് രണ്ടാം തവണയും മത്സരിച്ച ജ്യോതി ഗോണ്ടെക് പരാജയപ്പെട്ടു. തിങ്കളാഴ്ച വൈകുന്നേരം അനൗദ്യോഗിക ഫലങ്ങൾ പുറത്തുവന്നതിനെത്തുടർന്ന് പരാജയം സമ്മതിച്ച ജ്യോതി ഗോണ്ടെക് രാജി പ്രഖ്യാപിച്ചു. വോട്ടെടുപ്പിലെ മൂന്നിൽ രണ്ടു വോട്ടുകൾ എണ്ണിക്കഴിഞ്ഞപ്പോൾ പ്രധാന എതിരാളികളായ ജെറോം ഫാർക്കസിനും സോണിയ ഷാർപ്പിനും പിന്നിലായാണ് ജ്യോതി ഗോണ്ടെക്കിന്റെ സ്ഥാനം. നഗരത്തിലെ ഗതാഗത ആസൂത്രണം, ഈ വർഷം ആദ്യം ഉണ്ടായ ജലവിതരണപൈപ്പ് പൊട്ടിയുള്ള ദുരന്തം തുടങ്ങിയ വിഷയങ്ങളിൽ ജ്യോതി കടുത്ത വിമർശനം നേരിട്ടിരുന്നു.
വോട്ടെടുപ്പ് ഫലങ്ങൾ ഔദ്യോഗിക സ്ഥിരീകരണത്തിനായി കാത്തിരിക്കുമ്പോൾ, ഗോണ്ടെക്കിന്റെ രാജി കാൽഗറിയുടെ നേതൃത്വത്തിൽ ഒരു വഴിത്തിരിവിനെ സൂചിപ്പിക്കുന്നു. വീടുകളുടെ വില മുതൽ കാലാവസ്ഥാ പ്രതിരോധശേഷി വരെയുള്ള സങ്കീർണ്ണമായ വെല്ലുവിളികളാണ് ജ്യോതിയുടെ പിൻഗാമി നേരിടാനിരിക്കുന്നത്.
