ന്യൂയോര്ക്ക്: ഇന്ത്യയുമായുള്ള പ്രതിരോധ സഹകരണം ശക്തമാക്കുന്നതിനുള്ള നിര്ണ്ണായകമായ യുഎസ് പ്രതിരോധനയ ബില്ലില് പ്രസിഡന്റ് ഡോണള്ഡ് ട്രംപ് ഒപ്പിട്ടു. അടുത്ത സാമ്പത്തിക വര്ഷത്തേക്കുള്ള നാഷണല് ഡിഫന്സ് ഓതറൈസേഷന് ആക്ട് (NDAA) പ്രസിഡന്റ് ഒപ്പിട്ടതോടെ നിയമമായി മാറി. ഇന്തോ-പസിഫിക് മേഖലയില് ചൈനയുടെ സ്വാധീനം ചെറുക്കുന്നതിനായി ഇന്ത്യയെ ഒരു സുപ്രധാന പ്രതിരോധ പങ്കാളിയായി അമേരിക്ക പരിഗണിക്കുന്നു എന്നതിന്റെ വ്യക്തമായ സൂചനയാണിത്.
‘കരുത്തിലൂടെ സമാധാനം’ (Peace through Strength) എന്ന ട്രംപിന്റെ നയത്തിന്റെ ഭാഗമായാണ് പുതിയ പ്രതിരോധ നിയമം നടപ്പിലാക്കുന്നത്. ഇതിന്റെ ഭാഗമായി യുഎസ് പ്രതിരോധ വകുപ്പിന്റെ പേര് നേരത്തെ ‘യുദ്ധവകുപ്പ്’ (Department of War) എന്ന് പുനര്നാമകരണം ചെയ്തിരുന്നു. ചൈനയുമായുള്ള ആഗോള മത്സരത്തില് ഇന്ത്യയെ ഒരു സുപ്രധാന പങ്കാളിയായി അമേരിക്ക കാണുന്നു. ക്വാഡ് (Quad – ഇന്ത്യ, യുഎസ്, ജപ്പാന്, ഓസ്ട്രേലിയ) കൂട്ടായ്മയുടെ ഭാഗമായുള്ള സഹകരണം കൂടുതല് ശക്തമാക്കാന് ഈ നിയമം സഹായിക്കും.
പ്രതിരോധ സാങ്കേതികവിദ്യ കൈമാറ്റം ചെയ്യുന്നതിലും സംയുക്ത സൈനിക പരിശീലനങ്ങളിലും ഈ നിയമം ഇന്ത്യയ്ക്ക് കൂടുതല് മുന്ഗണന നല്കുന്നു. ഇന്തോ-പസിഫിക് മേഖലയിലെ സുരക്ഷാ വെല്ലുവിളികള് നേരിടാന് ഇരുരാജ്യങ്ങളും തമ്മിലുള്ള ബന്ധം കൂടുതല് ദൃഢമാകും. ചൈനയുടെ കടന്നുകയറ്റങ്ങളെ പ്രതിരോധിക്കാന് ഇന്ത്യയുമായുള്ള തന്ത്രപരമായ പങ്കാളിത്തം അത്യന്താപേക്ഷിതമാണെന്ന ട്രംപ് ഭരണകൂടത്തിന്റെ വിലയിരുത്തലാണ് ഈ നിയമത്തിലൂടെ വ്യക്തമാകുന്നത്. വരും വര്ഷങ്ങളില് ഇന്ത്യയും അമേരിക്കയും തമ്മിലുള്ള ആയുധ ഇടപാടുകളിലും സൈനിക സഹകരണത്തിലും വലിയ മുന്നേറ്റം ഈ നിയമം വഴി ഉണ്ടാകുമെന്ന് പ്രതീക്ഷിക്കപ്പെടുന്നു.
