ടെല് അവീവ്: യുദ്ധവും പ്രകൃതിക്ഷോഭവും തകര്ത്ത ഗാസയില് ദുരിതാശ്വാസ പ്രവര്ത്തനങ്ങളില് ഏര്പ്പെട്ടിരിക്കുന്ന 37 അന്താരാഷ്ട്ര സന്നദ്ധ സംഘടനകള്ക്ക് (NGOs) ഇസ്രയേല് വിലക്കേര്പ്പെടുത്തി. ഹമാസുമായി ബന്ധമുണ്ടെന്ന് ആരോപിച്ചും പുതിയ സുരക്ഷാ മാനദണ്ഡങ്ങള് പാലിച്ചില്ലെന്ന് ചൂണ്ടിക്കാട്ടിയുമാണ് ഈ നടപടി. ഇത് ഗാസയിലെ മാനുഷിക സാഹചര്യം ‘അതീവ ഗുരുതരമായ’ അവസ്ഥയിലേക്ക് എത്തിക്കുമെന്ന് യുഎന് ഏജന്സികളും മനുഷ്യാവകാശ വിദഗ്ധരും മുന്നറിയിപ്പ് നല്കുന്നു.
പ്രമുഖ മെഡിക്കല് ചാരിറ്റിയായ ഡോക്ടേഴ്സ് വിത്തൗട്ട് ബോര്ഡേഴ്സ് (MSF), ഓക്സ്ഫാം (Oxfam), നോര്വീജിയന് റെഫ്യൂജി കൗണ്സില് (NRC), കെയര് (CARE), വേള്ഡ് വിഷന് ഇന്റര്നാഷണല് തുടങ്ങിയ 37 സംഘടനകളുടെ ലൈസന്സാണ് റദ്ദാക്കിയത്. സംഘടനകളിലെ പ്രാദേശിക ജീവനക്കാരുടെ വിശദമായ വിവരങ്ങള് കൈമാറണമെന്ന ഇസ്രായേലിന്റെ പുതിയ നിബന്ധനകള് അംഗീകരിക്കാത്തതാണ് പ്രധാന കാരണം. ജീവനക്കാര്ക്ക് തീവ്രവാദ ബന്ധമുണ്ടെന്നാണ് ഇസ്രയേല് ആരോപിക്കുന്നത്. എന്നാല് ഈ ആവശ്യങ്ങള് അന്താരാഷ്ട്ര നിയമങ്ങളുടെ ലംഘനമാണെന്നും ജീവനക്കാരുടെ സുരക്ഷയെ ബാധിക്കുമെന്നും സംഘടനകള് പ്രതികരിച്ചു.
ജനുവരി ഒന്നിന് വിലക്ക് പ്രാബല്യത്തില് വന്നു. ഇതോടെ ഈ സംഘടനകള്ക്ക് വരും ദിവസങ്ങളില് ഗസ്സയിലെ പ്രവര്ത്തനം പൂര്ണ്ണമായും അവസാനിപ്പിക്കേണ്ടി വരും. രണ്ടു വര്ഷത്തിലേറെയായി തുടരുന്ന യുദ്ധത്തിന് പിന്നാലെ ഗാസയില് അതിശൈത്യവും ശക്തമായ മഴയും മൂലം ഉണ്ടായ പ്രളയം ലക്ഷക്കണക്കിന് ആളുകളെ ദുരിതത്തിലാക്കിയിരിക്കുകയാണ്. ഈ സാഹചര്യത്തില് സഹായ ഏജന്സികളെ പുറത്താക്കുന്നത് താഴെ പറയുന്ന പ്രതിസന്ധികള്ക്ക് കാരണമാകും:
ഗാസയിലെ മൂന്നിലൊന്ന് ആരോഗ്യ കേന്ദ്രങ്ങളും പ്രവര്ത്തിക്കുന്നത് ഈ സംഘടനകളുടെ സഹായത്തോടെയാണ്. എംഎസ്എഫ് മാത്രം ഏകദേശം 20% ആശുപത്രി ബെഡുകളുടെയും മൂന്നിലൊന്ന് പ്രസവ ശുശ്രൂഷകളുടെയും ചുമതല വഹിക്കുന്നു. കുട്ടികള്ക്കിടയിലെ കടുത്ത പോഷകാഹാരക്കുറവ് പരിഹരിക്കാനായി ഗാസയിലുള്ള അഞ്ച് സ്റ്റെബിലൈസേഷന് സെന്ററുകളും പ്രവര്ത്തിപ്പിക്കുന്നത് ഈ സംഘടനകളാണ്.
അതിശൈത്യത്തില് നിന്ന് രക്ഷനേടാന് ലക്ഷക്കണക്കിന് ആളുകള്ക്ക് ടെന്റുകളും വസ്ത്രങ്ങളും നല്കുന്നത് ഈ എന്ജിഒകളാണ്. ഇസ്രയേലിന്റെ നടപടി ‘അതിക്രൂരമാണെന്ന്’ യുഎന് മനുഷ്യാവകാശ മേധാവി വോള്ക്കര് ടര്ക്ക് പറഞ്ഞു. സഹായം എത്തിക്കുന്നതില് ഇസ്രയേല് രാഷ്ട്രീയ താല്പ്പര്യങ്ങള് കലര്ത്തുകയാണെന്ന് ആംനസ്റ്റി ഇന്റര്നാഷണല് കുറ്റപ്പെടുത്തി. അമേരിക്കന് പ്രസിഡന്റ് ഡോണള്ഡ് ട്രംപിന്റെ സമ്മര്ദ്ദമാണ് ഈ തീരുമാനത്തിന് പിന്നിലെന്നും ചില റിപ്പോര്ട്ടുകള് സൂചിപ്പിക്കുന്നു.
