ഓട്ടവ: സാൽമൊണെല്ല അണുബാധയെ തുടർന്ന് സി ജി മെയ് ബ്രാൻഡ് (Si Ji Mei) വുഹാൻ എഗ്ഗ് ഷീറ്റ്സ് വിത്ത് ഗ്ലൂട്ടിനസ് റൈസ് ഉൽപ്പന്നം തിരിച്ചുവിളിച്ച് കനേഡിയൻ ഫുഡ് ഇൻസ്പെക്ഷൻ ഏജൻസി (CFIA). ആൽബർട്ട, ബ്രിട്ടിഷ് കൊളംബിയ പ്രവിശ്യകളിൽ വിറ്റഴിച്ച 580 ഗ്രാമിൻറെ പാക്കറ്റുകളിൽ ലഭ്യമായ, 6 977013 950971 എന്ന യുപിസി കോഡും 2025/09/12 എന്ന കാലാവധി തീയതിയുമുള്ള ഉൽപ്പന്നങ്ങളാണ് തിരിച്ചുവിളിയിൽ ഉൾപ്പെട്ടിരിക്കുന്നത്. ഈ ഉൽപ്പന്നം കഴിച്ചതിനെത്തുടർന്ന് ചിലർക്ക് ശാരീരിക അസ്വാസ്ഥ്യങ്ങൾ ഉണ്ടായതായി റിപ്പോർട്ടുകൾ പുറത്തുവന്നിരുന്നു.
തിരിച്ചുവിളിച്ച ഉൽപ്പന്നങ്ങൾ ഉപേക്ഷിക്കുകയോ വാങ്ങിയ സ്ഥലത്ത് തിരികെ നൽകുകയോ ചെയ്യണമെന്നും അവ കഴിച്ച് അസുഖം ബാധിച്ചതായി സംശയിക്കുന്നുവെങ്കിൽ ആരോഗ്യപ്രവർത്തകരുമായി ബന്ധപ്പെടണമെന്നും CFIA ഉപഭോക്താക്കളോട് നിർദ്ദേശിച്ചു. സാൽമൊണെല്ലയുമായി ബന്ധപ്പെട്ട ലക്ഷണങ്ങളിൽ വിറയൽ, പനി, തലവേദന, ഛർദ്ദി, ഓക്കാനം, വയറുവേദന, വയറിളക്കം എന്നിവ ഉൾപ്പെടാമെന്ന് ഏജൻസി പറയുന്നു. രോഗലക്ഷണങ്ങൾ സാധാരണയായി എക്സ്പോഷർ കഴിഞ്ഞ് ആറ് മുതൽ 72 മണിക്കൂറിനുള്ളിൽ ആരംഭിക്കുമെന്നും, മിക്ക ലക്ഷണങ്ങളും നാല് മുതൽ ഏഴ് ദിവസങ്ങൾക്കുള്ളിൽ അവസാനിക്കുമെന്നും ഏജൻസി കൂട്ടിച്ചേർത്തു.
