മുംബൈ: ബജറ്റ് വിഹിതവും അമേരിക്കന് വിപണിയിലെ പുതിയ സാധ്യതകളും ഇലക്ട്രോണിക്സ് മാനുഫാക്ചറിംഗ് മേഖലയിലെ കമ്പനികള്ക്ക് വന് നേട്ടമാണ് നല്കുന്നത്. ആഗോള വിതരണ ശൃംഖലയില് ഇന്ത്യയുടെ പ്രാധാന്യം വര്ധിക്കുന്നത് ഈ സെക്ടറിലെ ഓഹരികളില് ദീര്ഘകാല നിക്ഷേപത്തിന് വഴിതുറക്കുന്നു.
ബജറ്റിലെ 40,000 കോടി രൂപയുടെ പ്രത്യേക പാക്കേജിന് പിന്നാലെ അമേരിക്കയുമായുള്ള പുതിയ വ്യാപാര കരാര് കൂടി വന്നതോടെ ഈ മേഖലയിലെ ഓഹരികളില് വലിയ നിക്ഷേപ താല്പ്പര്യം നിലനില്ക്കുന്നു. തീരുവ കുറഞ്ഞതോടെ ഡിക്സണ് ടെക്നോളജീസ്, കെയ്ന്സ് തുടങ്ങിയ കമ്പനികള്ക്ക് അമേരിക്കന് വിപണിയില് കൂടുതല് സ്വാധീനം നേടാനാകുമെന്നത് ഓഹരി വിലയെ അനുകൂലമായി ബാധിക്കുന്നു.
വിപണിയിലെ താല്ക്കാലിക ഇടിവുകളെ വാങ്ങാനുള്ള അവസരമായി നിക്ഷേപകര് കാണുന്നുണ്ട്. എങ്കിലും ഐടി മേഖലയിലെ ആഗോള തകര്ച്ചയും വിദേശ നിക്ഷേപകരുടെ തുടര്ന്നുള്ള നീക്കങ്ങളും വരും മണിക്കൂറുകളില് നിര്ണ്ണായകമാകും. 25,700-25,800 എന്ന നിലവാരം നിഫ്റ്റിക്ക് ശക്തമായ ഒരു സപ്പോര്ട്ട് മേഖലയായി പ്രവര്ത്തിക്കുന്നു.
ബുധനാഴ്ച ഇന്ത്യന് ഓഹരി വിപണി ചാഞ്ചാട്ടത്തോടെയാണെങ്കിലും നേട്ടത്തില് വ്യാപാരം ആരംഭിച്ചു. ഇന്ത്യ-അമേരിക്ക വ്യാപാര കരാര് നല്കിയ ആവേശം വിപണിയില് പ്രകടമാണെങ്കിലും, ആഗോളതലത്തില് ടെക് ഓഹരികളില് ഉണ്ടായ തകര്ച്ച ഐടി കമ്പനികളുടെ ഓഹരികളില് വില്പന സമ്മര്ദ്ദമുണ്ടാക്കി. സെന്സെക്സ് ഏകദേശം 100 പോയിന്റ് ഉയര്ന്നു നില്ക്കുമ്പോള് നിഫ്റ്റി 25,750 നിലവാരത്തിന് മുകളില് തുടരുന്നു. ഒന്പത് മാസത്തിനിടയിലെ ഏറ്റവും വലിയ ഏകദിന കുതിപ്പിന് (2.5%) ശേഷവും വിപണി ഈ നിലവാരത്തില് ഉറച്ചുനില്ക്കുന്നത് നിക്ഷേപകരുടെ ആത്മവിശ്വാസം വര്ധിപ്പിക്കുന്നു.
