മിലാനോ കോർട്ടിന: 2026 വിന്റർ ഒളിംപിക്സിൽ കാനഡയ്ക്ക് ആദ്യ വെള്ളി മെഡൽ. ചൊവ്വാഴ്ച നടന്ന ഷോർട്ട്- ട്രാക്ക് സ്പീഡ് സ്കേറ്റിങ് മിക്സഡ് ടീം ഇനത്തിലാണ് കാനഡ രണ്ടാം സ്ഥാനം കരസ്ഥമാക്കി രാജ്യത്തിന്റെ അഭിമാനമുയർത്തിയത്. വില്യം ഡാൻജിനോ, ഫെലിക്സ് റൂസൽ, കോർട്ട്നി സരോൾട്ട്, കിം ബൗട്ടിൻ എന്നിവരടങ്ങുന്ന സംഘമാണ് ഫൈനലിൽ കാനഡയ്ക്കായി മത്സരിച്ചത്.ആതിഥേയരായ ഇറ്റലി ഈ ഇനത്തിൽ സ്വർണം നേടിയപ്പോൾ ബെൽജിയം വെങ്കലം സ്വന്തമാക്കി.
സെമി ഫൈനലിൽ അമേരിക്കൻ, കൊറിയൻ താരങ്ങളെ അപകടങ്ങൾ ഒഴിവാക്കിക്കൊണ്ട് നേരിട്ട കോർട്ട്നി സരോൾട്ടിന്റെ പ്രകടനമാണ് കാനഡയെ ഫൈനലിലേക്ക് നയിച്ചത്. ഈ ഒളിമ്പിക്സിൽ കാനഡ നേടുന്ന മൂന്നാമത്തെ മെഡലാണിത്. നേരത്തെ സ്പീഡ് സ്കേറ്റിങ്ങിൽ വലേരി മാൾട്ടൈസും ഫ്രീസ്റ്റൈൽ സ്കീയിങ്ങിൽ മേഗൻ ഓൾഡാമും കാനഡയ്ക്കായി വെങ്കല മെഡലുകൾ നേടിയിരുന്നു.
