തിരുവനന്തപുരം: സംസ്ഥാനത്തെ വോട്ടര് പട്ടിക തീവ്ര പരിഷ്കരണത്തിന് ശേഷമുള്ള അന്തിമ വോട്ടര്പട്ടിക ഇന്ന് പ്രസിദ്ധീകരിക്കും. തിരഞ്ഞെടുപ്പ് കമ്മീഷന് പുറത്തുവിട്ട ഏറ്റവും പുതിയ കണക്കുകള് പ്രകാരം ആകെ 2,69,53,644 വോട്ടര്മാരാണ് പട്ടികയിലുള്ളത്. ഇതില് 1,31,26,048 പുരുഷന്മാരും 1,38,27,319 സ്ത്രീകളും 277 ട്രാന്സ്ജെന്ഡര് വോട്ടര്മാരും ഉള്പ്പെടുന്നു. കൂടാതെ 2,23,558 പ്രവാസി വോട്ടര്മാരും 4,24,518 പുതിയ വോട്ടര്മാരും പട്ടികയില് ഇടംപിടിച്ചിട്ടുണ്ട്.
ഡിസംബര് 23-ന് പ്രസിദ്ധീകരിച്ച കരട് വോട്ടര് പട്ടികയില് 2,54,42,352 വോട്ടര്മാരാണുണ്ടായിരുന്നത്. അന്ന് ഏകദേശം 24.08 ലക്ഷം പേര് പട്ടികയില് നിന്ന് പുറത്തായിരുന്നു. എന്നാല് പുതിയ അപേക്ഷകള് പരിഗണിച്ചതോടെ അന്തിമ പട്ടികയില് 15,11,292 വോട്ടര്മാരുടെ വര്ധനവുണ്ടായി. കരട് പട്ടികയില് നിന്ന് പരിശോധനകള്ക്ക് ശേഷം 53,229 പേരെ ഒഴിവാക്കിയിട്ടുണ്ട്. തീവ്ര പരിഷ്കരണ നടപടികള്ക്ക് ശേഷം പ്രസിദ്ധീകരിക്കുന്ന ഈ പട്ടികയില് മുന്പത്തെ തദ്ദേശ തിരഞ്ഞെടുപ്പ് പട്ടികയെ അപേക്ഷിച്ച് വോട്ടര്മാരുടെ എണ്ണത്തില് കുറവുണ്ടെന്നതും ശ്രദ്ധേയമാണ്.
കരട് പട്ടികയിന്മേലുള്ള പരാതികള് സ്വീകരിക്കുകയും കൃത്യമായ ഹിയറിങ് നടപടികള് പൂര്ത്തിയാക്കുകയും ചെയ്ത ശേഷമാണ് തിരഞ്ഞെടുപ്പ് കമ്മീഷന് അന്തിമ പട്ടിക ഇന്ന് പുറത്തിറക്കുന്നത്. വോട്ടര് പട്ടികയിലെ ഇരട്ടിപ്പും മരണപ്പെട്ടവരുടെ വിവരങ്ങളും ഒഴിവാക്കി പട്ടിക കുറ്റമറ്റതാക്കാനുള്ള ശ്രമങ്ങളാണ് ഇത്തവണ നടന്നത്. പൊതുജനങ്ങള്ക്ക് തിരഞ്ഞെടുപ്പ് കമ്മീഷന്റെ വെബ്സൈറ്റ് വഴി തങ്ങളുടെ പേര് പട്ടികയില് ഉണ്ടെന്ന് ഉറപ്പുവരുത്താവുന്നതാണ്.
