ഓട്ടവ : പൊള്ളലേൽക്കാൻ സാധ്യതയുള്ളതിനാൽ ഡ്യൂപ്രേ നീറ്റ് സ്റ്റീം ക്ലീനർ തിരിച്ചുവിളിച്ചതായി ഹെൽത്ത് കാനഡ അറിയിച്ചു. സ്റ്റീം ക്ലീനറിന്റെ ബോയിലർ അമിതമായി നിറയുകയോ, തുരുമ്പെടുക്കുകയോ, പ്രഷർ റിലീസ് വാൽവ് (ബോയിലർ ക്യാപ്പ്) തകരാറിലാകുകയോ ചെയ്യുമ്പോൾ, ബോയിലർ പൊട്ടിപ്പോകാൻ സാധ്യതയുണ്ട്, റീകോൾ അലർട്ടിൽ പറയുന്നു. ഇതുമൂലം നിരവധി ഗാർഹിക പ്രതലങ്ങളിൽ ഉപയോഗിക്കാൻ കഴിയുന്ന ഭാരം കുറഞ്ഞതും പോർട്ടബിൾ ഹോം സ്റ്റീം ക്ലീനറുമായ ഡ്യൂപ്രേ നീറ്റ് സ്റ്റീം ക്ലീനർ ഉപയോക്താക്കൾക്കോ സമീപത്തുള്ളവർക്കോ ഗുരുതരമായ പരുക്കുകളോ പൊള്ളലോ ഉണ്ടാക്കാൻ സാധ്യതയുണ്ടെന്ന് ഫെഡറൽ ഏജൻസി വ്യക്തമാക്കി.
DUP020WNA എന്ന മോഡൽ നമ്പറുള്ള ഉൽപ്പന്നങ്ങളാണ് തിരിച്ചു വിളിച്ചിരിക്കുന്നത്. ജനുവരി 20 വരെ ബോയിലർ പൊട്ടിത്തെറിച്ചതായി 15 റിപ്പോർട്ടുകൾ കമ്പനിക്ക് ലഭിച്ചു. അതിൽ നാല് ചെറിയ പൊള്ളലുകൾ, ചതവുകൾ, മുറിവുകൾ എന്നിവയുൾപ്പെടെയുള്ള പരുക്കുകൾ ഉണ്ടായിട്ടുണ്ട്. ഇതിൽ മൂന്ന് പരാതികൾ കാനഡയിലും 12 എണ്ണം യുണൈറ്റഡ് സ്റ്റേറ്റ്സിൽ നിന്നുമാണ്. 2018 ഏപ്രിൽ മുതൽ 2025 ഡിസംബർ വരെ, കമ്പനി തിരിച്ചുവിളിച്ച ഉൽപ്പന്നത്തിന്റെ യുഎസിൽ ഏകദേശം 97,000 യൂണിറ്റുകളും കാനഡയിൽ ഏകദേശം 650,000 യൂണിറ്റുകളും വിറ്റഴിച്ചിട്ടുണ്ട്.
ഉപയോക്താക്കൾ തിരിച്ചുവിളിച്ച ഉൽപ്പന്നം ഉപയോഗിക്കുന്നത് ഉടൻ നിർത്തണമെന്നും ബോയിലർ ക്യാപ്പ് സൗജന്യമായി മാറ്റുന്നതിന് ഡ്യൂപ്രേയെ ബന്ധപ്പെടണമെന്നും ഫെഡറൽ ഏജൻസി നിർദ്ദേശിച്ചു. കൂടുതൽ വിവരങ്ങൾക്ക്, ഉപയോക്താക്കൾക്ക് recall@dupray.com എന്ന ഇമെയിൽ വിലാസത്തിലോ വെബ്സൈറ്റ് വഴിയോ ഡ്യൂപ്രേയെ ബന്ധപ്പെടാം.
