മൺട്രിയോൾ: കെബെക്ക് നിവാസികൾ സോഷ്യൽ മീഡിയയിൽ ചിലവഴിക്കുന്ന സമയം വെറും ഒരു വർഷത്തിനുള്ളിൽ ഏകദേശം ഒരു മണിക്കൂറോളം വർധിച്ചതായി പുതിയ പഠനം. യൂണിവേഴ്സിറ്റി ലാവൽ (Université Laval) നടത്തിയ ഏറ്റവും പുതിയ പഠന റിപ്പോർട്ട് അനുസരിച്ച്, സോഷ്യൽ മീഡിയയിൽ സജീവമായ
കെബെക്ക് നിവാസികൾ ഇപ്പോൾ ശരാശരി 3 മണിക്കൂർ 41 മിനിറ്റാണ് പ്രതിദിനം ഓൺലൈനിൽ ചിലവഴിക്കുന്നത്. ഇത് കഴിഞ്ഞ വർഷത്തെ അപേക്ഷിച്ച് 51 മിനിറ്റ് കൂടുതലാണ്. മുൻകാലങ്ങളിൽ യുവാക്കൾ മാത്രമാണ് സ്ക്രീനിന് മുന്നിൽ കൂടുതൽ സമയം ചിലവഴിച്ചിരുന്നതെങ്കിൽ, ഇപ്പോൾ പ്രായമായവരും ഈ ശീലത്തിൽ യുവാക്കൾക്ക് ഒപ്പമെത്തുകയാണെന്ന് പഠനം ചൂണ്ടിക്കാട്ടുന്നു.
55 വയസ്സിനു മുകളിൽ പ്രായമുള്ളവരിലാണ് സ്ക്രീൻ ടൈമിൽ ഏറ്റവും വലിയ വർധന രേഖപ്പെടുത്തിയിരിക്കുന്നത്. ഈ പ്രായവിഭാഗത്തിലുള്ളവർ കഴിഞ്ഞ വർഷത്തേക്കാൾ 77 മിനിറ്റ് അധികമായി സോഷ്യൽ മീഡിയയിൽ ചിലവഴിക്കുന്നുണ്ട്. വാർത്തകൾ അറിയുന്നതിനും വിനോദത്തിനും കുടുംബാംഗങ്ങളുമായി ബന്ധം നിലനിർത്തുന്നതിനും പ്രായമായവർ ഇപ്പോൾ കൂടുതലായി ഡിജിറ്റൽ ഉപകരണങ്ങളെ ആശ്രയിക്കുന്നു. 25 വയസ്സിന് മുകളിലുള്ളവർ ഇപ്പോഴും ഫേസ്ബുക്കിനെയാണ് പ്രധാനമായും ആശ്രയിക്കുന്നതെങ്കിലും, ‘റീൽസ്’ പോലുള്ള ഹ്രസ്വ വിഡിയോകൾ എല്ലാ പ്രായക്കാരെയും ഫോണിലേക്ക് ആകർഷിക്കുന്നു. ഇൻസ്റ്റാഗ്രാം, ടിക് ടോക് തുടങ്ങിയ ആപ്പുകൾ മറ്റ് പ്ലാറ്റ്ഫോമുകളേക്കാൾ കൂടുതൽ സമയം ആളുകളെ പിടിച്ചിരുത്തുന്നതായും സർവേയിൽ പങ്കെടുത്ത പകുതിയോളം പേരും ഒഴിവുസമയങ്ങളിൽ ഫോൺ മാറ്റിവെക്കാൻ പ്രയാസപ്പെടുന്നതായും സമ്മതിക്കുന്നു.
ഉപഭോക്താക്കളുടെ താൽപ്പര്യങ്ങൾ തിരിച്ചറിഞ്ഞ് അവരെ കൂടുതൽ നേരം സ്ക്രീനിൽ നിലനിർത്തുന്ന രീതിയിലാണ് ഈ ആപ്പുകളിലെ അൽഗോരിതങ്ങൾ രൂപകൽപ്പന ചെയ്തിരിക്കുന്നതെന്ന് സൈക്കോളജി വിഭാഗം അസിസ്റ്റന്റ് പ്രൊഫസർ യൂസഫ് അല്ലാമി വിശദീകരിക്കുന്നു. നിരന്തരമായ ഉപയോഗം മൂലം ശ്രദ്ധ കേന്ദ്രീകരിക്കാനുള്ള കഴിവ് കുറയുന്നതായി ചില യുവാക്കൾ പരാതിപ്പെടുന്നുണ്ടെങ്കിലും, സ്ക്രീൻ ടൈം കൂടുന്നത് എപ്പോഴും ഒരു പ്രശ്നമാകണമെന്നില്ലെന്നും അദ്ദേഹം കൂട്ടിച്ചേർത്തു. എന്നാൽ സോഷ്യൽ മീഡിയ ഉപയോഗം ജോലിയിലോ പഠനത്തിലോ ശ്രദ്ധ കേന്ദ്രീകരിക്കുന്നതിന് തടസ്സമാവുകയും വൈകാരികമോ സാമൂഹികമോ ആയ പ്രശ്നങ്ങളിലേക്ക് നയിക്കുകയും ചെയ്യുമ്പോഴാണ് അത് ഗൗരവകരമായ പ്രശ്നമായി മാറുന്നതെന്ന് വിദഗ്ധർ മുന്നറിയിപ്പ് നൽകുന്നു.
