കാൽഗറി: കാൽഗറിയിൽ ഞായറാഴ്ച രാവിലെ ഉണ്ടായ സാങ്കേതിക തകരാറിനെത്തുടർന്ന് പതിനൊന്നായിരത്തിലധികം വീടുകളിൽ വൈദ്യുതി തടസ്സപ്പെട്ടു. ഞായറാഴ്ച രാവിലെ ഏകദേശം 11:07 ഓടെയാണ് വിവിധയിടങ്ങളിൽ വൈദ്യുതി തടസം അനുഭവപ്പെട്ടു തുടങ്ങിയത്.
മാർട്ടിൻഡേൽ, കോർണർസ്റ്റോൺ, സാഡിൽ റിഡ്ജ്, സ്റ്റോണി 3, ഹോംസ്റ്റഡ് തുടങ്ങി പത്തിലധികം മേഖലകളിലെ ജനജീവിതത്തെ ഇത് ബാധിച്ചു. ഏകദേശം 11:15 ഓടെ ഔദ്യോഗിക സ്ഥിരീകരണം നൽകിയ എൻമാക്സ് അധികൃതർ, റിവർബെൻഡ്, അക്കേഡിയ തുടങ്ങിയ സ്ഥലങ്ങളിലെ തകരാർ പരിഹരിക്കാൻ അടിയന്തര നടപടികൾ സ്വീകരിച്ചിരുന്നതായും അറിയിച്ചു.
തകരാർ സംഭവിച്ച സ്ഥലങ്ങളിൽ എൻമാക്സ് പ്രതിനിധികൾ നേരിട്ടെത്തി അറ്റകുറ്റപ്പണികൾ നടത്തി. ഉച്ചയ്ക്ക് 1:30 ഓടെ നഗരത്തിലെ എല്ലാ ഭാഗങ്ങളിലും വൈദ്യുതി വിതരണം പൂർണ്ണമായും പുനഃസ്ഥാപിക്കാൻ സാധിച്ചു. തടസം നേരിട്ട സമയങ്ങളിൽ കമ്പനിയുടെ വെബ്സൈറ്റ് വഴി ഉപഭോക്താക്കൾക്ക് കൃത്യമായ വിവരങ്ങൾ നൽകിയിരുന്നതായും അധികൃതർ വ്യക്തമാക്കി.
