സിഡ്നി: മിഡിൽ ഈസ്റ്റിൽ വർധിച്ചുവരുന്ന സംഘർഷത്തിൽ കാനഡയുടെ സൈനിക പങ്കാളിത്തം പൂർണ്ണമായും തള്ളിക്കളയാനാവില്ലെന്ന് പ്രധാനമന്ത്രി മാർക്ക് കാർണി. ഓസ്ട്രേലിയൻ പ്രധാനമന്ത്രി ആന്തണി അൽബനീസിയുമായി കാൻബറയിൽ നടത്തിയ സംയുക്ത വാർത്താ സമ്മേളനത്തിലാണ് കാർണി കാനഡയുടെ നിലപാട് വ്യക്തമാക്കിയത്. സംഘർഷം വൻതോതിൽ വ്യാപിക്കാൻ സാധ്യതയുള്ളതിനാൽ ഭാവിയിലെ ഇടപെടലുകളെക്കുറിച്ച് ഇപ്പോൾ കൃത്യമായ പ്രവചനം നടത്താനാവില്ലെന്ന് അദ്ദേഹം കൂട്ടിച്ചേർത്തു.
സഖ്യകക്ഷികൾക്കൊപ്പം കാനഡ ഉറച്ചുനിൽക്കുമെന്നും എന്നാൽ യുഎസും ഇസ്രയേലും നടത്തുന്ന ആക്രമണങ്ങളിൽ കാനഡ നിലവിൽ പങ്കാളിയല്ലെന്നും കാർണി പറഞ്ഞു. കാനഡയുമായോ മറ്റ് സഖ്യകക്ഷികളുമായോ കൂടിയാലോചന നടത്താതെയാണ് ഈ ആക്രമണങ്ങൾ നടന്നത്. എങ്കിലും കനേഡിയൻ പൗരന്മാരുടെ സുരക്ഷ ഉറപ്പാക്കുമെന്നും സഖ്യകക്ഷികൾ ആവശ്യപ്പെടുമ്പോൾ അവർക്കൊപ്പം
നിൽക്കുമെന്നും അദ്ദേഹം വ്യക്തമാക്കി.
അതേസമയം, അമേരിക്കൻ പ്രസിഡന്റ് ഡോണൾഡ് ട്രംപിന്റെ സമ്മർദ്ദത്തിന് വഴങ്ങി കാനഡ ഈ യുദ്ധത്തിലേക്ക് വലിച്ചിഴയ്ക്കപ്പെടാൻ സാധ്യതയുണ്ടെന്ന് വിദഗ്ധർ വിലയിരുത്തുന്നു. അമേരിക്കയുമായുള്ള വ്യാപാര കരാറുകൾ (CUSMA) സംരക്ഷിക്കേണ്ടത് കാനഡയുടെ സാമ്പത്തിക ഭദ്രതയ്ക്ക് അനിവാര്യമാണ്. ഹോർമുസ് കടലിടുക്ക് വഴി നടത്തുന്ന എണ്ണക്കടത്തിന് സുരക്ഷയൊരുക്കാൻ കാനഡയുടെ നാവികസേനയെ ട്രംപ് ആവശ്യപ്പെട്ടേക്കാം. ട്രംപിനെ പിണക്കാതിരിക്കാനും അതേസമയം കാനഡയിൽ അപ്രിയമായേക്കാവുന്ന ഒരു യുദ്ധത്തിൽ നിന്ന് അകലം പാലിക്കാനുമാണ് കാർണി ഇപ്പോൾ ശ്രമിക്കുന്നതെന്ന് രാഷ്ട്രീയ നിരീക്ഷകർ അഭിപ്രായപ്പെടുന്നു.
