ഓട്ടവ: ന്യൂയോർക്കിലെ ലാഗ്വാർഡിയ വിമാനത്താവളത്തിലുണ്ടായ വിമാനാപകടത്തിന് പിന്നാലെ പുറത്തിറക്കിയ അനുശോചന സന്ദേശത്തിൽ ഫ്രഞ്ച് ഭാഷ ഉപയോഗിക്കാത്തതിൽ എയർ കാനഡ ചീഫ് എക്സിക്യൂട്ടീവ് മൈക്കൽ റൂസ്സോ പരസ്യമായി മാപ്പ് പറഞ്ഞു. അപകടത്തിൽ മരിച്ചവരുടെ കുടുംബങ്ങളെ അഭിസംബോധന ചെയ്ത് അദ്ദേഹം പുറത്തിറക്കിയ നാല് മിനിറ്റ് ദൈർഘ്യമുള്ള വിഡിയോ സന്ദേശത്തിൽ “ബോൺജൂർ” (Bonjour), “മെഴ്സി” (Merci) എന്നീ രണ്ട് ഫ്രഞ്ച് വാക്കുകൾ മാത്രമാണ് ഉൾപ്പെടുത്തിയത്. മൺട്രിയോളിൽ നിന്നുള്ള യാത്രക്കാരും കൊല്ലപ്പെട്ട പൈലറ്റുമാരിൽ ഒരാളായ ആന്റണി ഫോറസ്റ്റ് ഉൾപ്പെടെയുള്ള ജീവനക്കാരും ഫ്രഞ്ച് സംസാരിക്കുന്ന കാനഡക്കാരായതിനാലാണ് ഈ നടപടി വലിയ പ്രതിഷേധത്തിന് കാരണമായത്.
എയർ കാനഡ മേധാവിയുടെ ഈ നടപടി വിവേകശൂന്യവും സഹാനുഭൂതിയില്ലാത്തതുമാണെന്ന് പ്രധാനമന്ത്രി മാർക്ക് കാർണി വിമർശിച്ചു. സംഭവത്തെത്തുടർന്ന് ഔദ്യോഗിക ഭാഷാ സമിതിക്ക് മുമ്പാകെ മൊഴി നൽകാൻ ഹൗസ് ഓഫ് കോമൺസ് റൂസ്സോയ്ക്ക് സമൻസ് അയച്ചിട്ടുണ്ട്. തന്റെ ഭാഷാപരമായ പരിമിതികൾ പൈലറ്റുമാരുടെ കുടുംബങ്ങളുടെ ദുഃഖത്തിൽ നിന്ന് പൊതുശ്രദ്ധ തിരിച്ചുവിട്ടതിൽ താൻ അതീവ ദുഃഖിതനാണെന്ന് റൂസ്സോ പ്രസ്താവനയിൽ അറിയിച്ചു. വർഷങ്ങളോളം പരിശീലനം നേടിയിട്ടും ഫ്രഞ്ച് ഭാഷയിൽ ആശയവിനിമയം നടത്താൻ തനിക്ക് സാധിക്കാത്തതിൽ അദ്ദേഹം ഖേദം പ്രകടിപ്പിച്ചു.
