ടൊറൻ്റോ : അമേരിക്കയിൽ നിന്ന് കാനഡയിലേക്ക് കടത്താൻ ശ്രമിച്ച പുകയില ഉൽപ്പന്നങ്ങളും നിക്കോട്ടിൻ വേയ്പ്പ്സുകളും (Vapes) കാനഡ ബോർഡർ സർവീസസ് ഏജൻസി (CBSA) പിടികൂടി. ഒൻ്റാരിയോയിലെ സാർനിയയിലുള്ള ബ്ലൂ വാട്ടർ ബ്രിഡ്ജിലെ പോയിൻ്റ് എഡ്വേർഡ് എൻട്രി പോർട്ടിൽ കഴിഞ്ഞ ഏഴ് ദിവസത്തിനിടെയാണ് ഈ വൻ വേട്ട നടന്നത്. പിടിച്ചെടുത്ത ഉൽപ്പന്നങ്ങൾക്ക് രാജ്യാന്തര വിപണിയിൽ ഏകദേശം 45 ലക്ഷം ഡോളറിലധികം വിലമതിക്കുമെന്ന് അധികൃതർ അറിയിച്ചു.
സംഘടിത കുറ്റകൃത്യങ്ങൾ തടയുന്നതിനും നിയമവിരുദ്ധ ഉൽപ്പന്നങ്ങൾ രാജ്യത്തേക്ക് എത്തുന്നത് തടയുന്നതിനും വേണ്ടിയുള്ള കർശനമായ പരിശോധനയുടെ ഭാഗമായാണ് ഈ നടപടിയെന്ന് സി.ബി.എസ്.എ സോഷ്യൽ മീഡിയയിലൂടെ വ്യക്തമാക്കി. അമേരിക്കയിൽ നിന്ന് അതിർത്തി കടന്നെത്തിയ ഈ നിരോധിത ഉൽപ്പന്നങ്ങൾ പിടിച്ചെടുത്തത് വഴി വലിയൊരു കള്ളക്കടത്ത് ശൃംഖലയെ പിടികൂടാൻ സാധിച്ചുവെന്ന് ഏജൻസി അവകാശപ്പെട്ടു. സംഭവവുമായി ബന്ധപ്പെട്ട് കൂടുതൽ അന്വേഷണം നടന്നുവരികയാണെന്നും മറ്റ് വിവരങ്ങൾ നിലവിൽ ലഭ്യമായിട്ടില്ലെന്നും അധികൃതർ അറിയിച്ചു.
